जम्मू : महाराष्ट्रातील मराठवाडा व विदर्भात भूकंपाचे धक्के ताजे असतानाच आता जम्मू आणि काश्मीर मधील डोडा भागात आज रविवारी पहाटे भूकंपाचे धक्के जाणवले. आज पहाटे ४:३२ वाजता झालेल्या या भूकंपाची तीव्रता रिश्टर स्केलवर ४.६ इतकी नोंदवण्यात आली आहे. पहाटेच्या गाढ झोपेत असताना बसलेल्या या धक्क्यांमुळे नागरिकांमध्ये प्रचंड घबराट पसरली असून अनेकांनी घराबाहेर धाव घेतली.सुदैवाने या घटनेत कोणतीही जीवितहानी झाल्याची माहिती नाही.
दरम्यान, नॅशनल सेंटर ऑफ सिसमोलॉजी ने दिलेल्या माहितीनुसार या भूकंपाचे केंद्र जमिनीपासून सुमारे १४० किलोमीटर खोल होते. तज्ज्ञांच्या मते, कमी खोलीवर होणारे भूकंप अधिक नुकसानकारक ठरतात.
डोडा परिसर भूकंपाच्या दृष्टीने संवेदनशील मानला जात असून तो सिस्मिक झोन IV मध्ये मोडतो. त्यामुळे प्रशासनाने इमारती अधिक सुरक्षित करण्यासाठी उपाययोजना सुरू केल्या आहेत. यासाठी विशेष पथकाची नियुक्तीही करण्यात आली आहे.
दरम्यान, शनिवारी महाराष्ट्रातील मराठवाडा व विदर्भातही रिश्टर स्केलवर ४.७ तीव्रतेचा भूकंप झाला होता. त्याचे धक्के नांदेड, परभणी आणि हिंगोली जिल्ह्यात जाणवले होते. मात्र, या घटनेतही कोणतीही हानी झालेली नाही.
Discussion about this post