मुंबई । राज्याचं अर्थसंकल्पीय अधिवेशन सुरु असून याच दरम्यान आज राज्याचे मंत्री आणि भाजपचे नेते गिरीश महाजन यांनी लक्षवेधी प्रश्न लावूनही एकनाथ खडसे अनुपस्थित असल्याबाबत टीका केली. त्याचे पडसाद सभागृहात उमटले.
गिरीश महाजन यांनी म्हटले की, एकनाथ खडसे प्रश्न टाकतात, पण सभागृहात उपस्थित नसतात. एकनाथ खडसे एकही दिवस सभागृहात नाहीत. ते घरुन प्रश्न टाकतात, लक्षवेधी प्रश्न लावतात. खडसे यांनी प्रश्न टाकल्यावर सभागृहात यायला हवं असे महाजन यांनी म्हटले. त्यांनी पुढे म्हटले की, एकनाथ खडसे यांनी उपस्थित केलेले प्रश्न दररोज सभागृहात असतात. त्यांच्या या लक्षवेधी लोकांना ब्लॅकमेलिंगसाठी वापरल्या जातात का, असा सवाल केला.
दरम्यान, खडसे यांची तब्येत ठीक नसल्याने ते सध्या सभागृहात उपस्थित राहत नाही. असे असले तरी एकनाथ खडसे यांचे प्रश्न राष्ट्रवादी काँग्रेस शरदचंद्र पवार पक्षाचे प्रदेशाध्यक्ष शशिकांत शिंदे हे मांडत असतात.मात्र एकनाथ खडसे यांच्या नावाने प्रश्न विचारण्याआधीच गिरीश महाजन यांनी नाराजी व्यक्त केली.
शशिकांत शिंदे एकनाथ खडसे यांचा प्रश्न विचारण्यासाठी उभे राहिले, मात्र गिरीश महाजन यांनी त्यांना आधीच थांबवले. गिरीश महाजन म्हणाले की, एकनाथ खडसे यांच्या नावाने प्रश्न विचारला जात आहे आणि त्याचं उत्तर मी देईल. पण आपण बघताय की, अधिवेशन सुरू झाल्यापासून एकनाथ खडसे यांच्या लक्षवेधी, त्यांचे ताराकीत प्रश्न दररोज येत आहेत. पण एकनाथ खडसे एकही दिवस सभागृहात हजर नाही. जे ते सभागृहात येतच नसतील, तर घरी बसू कशाला प्रश्न टाकतात? स्वत: घरी बसायचं आणि इथे अधिकाऱ्यांना कामाला लावायचं. हे सर्व कशासाठी चाललं आहे. यामागचा हेतू काय? तुम्हाला लोकांना मुद्दाम ब्लॅकमेल करायचं आहे का? असा गंभीर प्रश्न गिरीश महाजन यांनी उपस्थित केला. मात्र त्यांना शशिकांत शिंदे यांनी दिलेल्या उत्तराने सभागृहात एकच हशा पिकला.
Discussion about this post