नाशिक : भोंदू बाबा अशोक खरात प्रकरणाचा तपास दिवसेंदिवस वेग घेत असून विशेष तपास पथक (SIT) कडून सलग चौकशी सुरू आहे. या प्रकरणात कोणालाही सोडले जाणार नाही, अशा स्पष्ट सूचना मुख्यमंत्री देवेंद्र फडणवीस यांनी दिल्यानंतर तपास यंत्रणा अधिक सक्रिय झाली आहे. दरम्यान, SIT च्या चौकशीत काही धक्कादायक माहिती समोर आल्याची चर्चा राजकीय वर्तुळात रंगली आहे.
सूत्रांच्या माहितीनुसार, SIT ने खरातच्या फार्महाऊस मॅनेजर, शिपाई आणि मंदिराच्या पुजाऱ्याची तब्बल ८ तास चौकशी केली. या चौकशीतून खरातच्या संपर्कात असलेल्या काही प्रभावी व्यक्ती आणि राजकीय नेत्यांविषयी महत्त्वाची माहिती मिळाल्याचे सांगितले जात आहे. विशेष म्हणजे, खरातच्या फार्महाऊसवर कोण-कोण येत होते आणि त्यांची भेटींची वेळ याची सविस्तर टाइमलाईनही SIT च्या हाती लागली आहे.
याशिवाय मंदिरात पूजाविधीसाठी येणाऱ्या व्यक्तींची यादी देखील तपास पथकाला मिळाल्याने या प्रकरणाला नवे वळण मिळण्याची शक्यता व्यक्त केली जात आहे. लैंगिक शोषण आणि आर्थिक व्यवहारांशी संबंधित बाबींवर तपासाचा फोकस वाढवण्यात आला असून खरातच्या संपूर्ण नेटवर्कचा मोठा पर्दाफाश होण्याची शक्यता वर्तवली जात आहे.
दरम्यान, सलग पाचव्या दिवशी SIT कडून गोपनीय ठिकाणी खरातची चौकशी करण्यात आली आहे. पुढील टप्प्यात त्याला मिरगाव येथील ईशान्येश्वर मंदिर आणि फार्महाऊसवर नेऊन घटनास्थळी पुराव्यांची पडताळणी करण्याची तयारी सुरू असल्याची माहिती सूत्रांनी दिली आहे.
Discussion about this post