जळगाव : शहरात चोरट्यांचा उच्छाद दिवसेंदिवस वाढत असून आता भरदिवसाही घरफोड्या होऊ लागल्याने नागरिकांमध्ये भीतीचे वातावरण निर्माण झाले आहे. महाबळ परिसरातील देवेंद्रनगर येथील प्रभुस्पर्श अपार्टमेंटमध्ये भरदिवस चोरट्यांनी एकाच वेळी दोन फ्लॅट फोडत मोठा ऐवज लंपास केला.
प्रभुस्पर्श अपार्टमेंटमधील प्रितम साळुंखे यांच्या फ्लॅट नंबर १० मध्ये कुटुंबीय बाहेर असतानाच चोरट्यांनी कडी-कोयंडा तोडून घरात प्रवेश केला. बेडरूममधील कपाट फोडून २० हजारांची रोकड, सुमारे १७ ग्रॅम सोन्याचे दागिने आणि ३४० ग्रॅम चांदीच्या वस्तूंवर चोरट्यांनी हात साफ केला. एकूण सुमारे ६६ हजार ७५० रुपयांचा ऐवज चोरीला गेला आहे.
याच अपार्टमेंटमधील दुसऱ्या एका फ्लॅटलाही चोरट्यांनी लक्ष्य केले. घरमालक बाहेरगावी असल्याने त्यांच्या घराचे कुलूप तोडून चोरी करण्यात आली असून नेमका किती ऐवज लंपास झाला हे ते परतल्यानंतर स्पष्ट होणार आहे. धक्कादायक बाब म्हणजे, शेजारील आणखी एका फ्लॅटमध्येही चोरट्यांनी घुसण्याचा प्रयत्न केला, मात्र त्यांचे कुलूप न तुटल्याने मोठी चोरी टळली.
भरदिवसा घडलेल्या या घरफोड्यांमुळे परिसरात खळबळ उडाली असून नागरिक धास्तावले आहेत. या प्रकरणी रामानंदनगर पोलिस ठाण्यात गुन्हा दाखल करण्यात आला असून पोलिसांकडून चोरट्यांचा शोध सुरू आहे.
Discussion about this post