जळगाव । गुढीपाडव्याच्या आदल्या दिवशीच जळगावच्या सुवर्ण बाजारपेठेत सोन्या-चांदीच्या दरात मोठी घसरण झाल्याने ग्राहकांना दिलासा मिळाला आहे. लग्नसराई आणि सणासुदीच्या पार्श्वभूमीवर दागिने खरेदीचा विचार करणाऱ्यांसाठी ही मोठी संधी मानली जात आहे.
बुधवारी सकाळी बाजार उघडताच सोन्याच्या दरात तब्बल ₹८२४ ची घट नोंदवली गेली. त्यामुळे २४ कॅरेट सोन्याचा भाव जीएसटीसह प्रति १० ग्रॅम ₹१,५९,८५६ वर आला आहे. गेल्या तीन दिवसांत सातत्याने घसरण होत असल्याने ग्राहकांमध्ये उत्साहाचे वातावरण आहे.
चांदीच्या दरातही मोठी घसरण झाली असून बुधवारी प्रति किलो तब्बल ₹६,१८० ने दर कमी झाले. त्यामुळे चांदीचा भाव ₹२,५९,५६० प्रति किलोवर आला आहे. सलग घसरणीमुळे बाजारात खरेदीसाठी हालचाल वाढण्याची शक्यता व्यक्त केली जात आहे.
दरम्यान, आंतरराष्ट्रीय स्तरावर सुरू असलेल्या भू-राजकीय तणावाचा परिणाम सराफा बाजारावर स्पष्टपणे दिसत आहे. जागतिक बाजारातील अस्थिरता, डॉलर-रुपया दरातील चढ-उतार आणि गुंतवणूकदारांची सावध भूमिका यामुळे सोन्याच्या किमतीत सतत बदल होत आहेत.
सोन्याचे दर कमी झाले असले तरी ग्राहक अजूनही सावध भूमिका घेताना दिसत आहेत. मात्र, सणासुदीच्या पार्श्वभूमीवर बाजारात लवकरच खरेदीला वेग येईल, अशी अपेक्षा सुवर्ण व्यावसायिकांकडून व्यक्त केली जात आहे.
Discussion about this post