अहिल्यानगर । वारकरी संप्रदायाला काळिमा फासणारी एक संतापाजनक घटना अहिल्यानगर जिल्ह्यातून समोर आलीय आहे. एका कीर्तनकाराने अल्पवयीन मुलीवर अमानुष अत्याचार केल्याचा धक्कादायक प्रकार उघडकीस आला आहे. पारनेर तालुक्यातील ढवळपुरी येथील श्री दुर्गादेवी वारकरी शिक्षण संस्थेचा अध्यक्ष आणि कीर्तनकार यशवंत एकनाथ थोरात उर्फ अण्णासाहेब गुंजाळ यानं अल्पवयीन मुलीला गरम लोखंडी पक्कडने चटके देऊन अमानुष अत्याचार केला.
या प्रकरणी पोलिसांनी गुन्हा दाखल करत आरोपी गुंजाळ याला बेड्या ठोकल्या आहेत. गेल्या पाच वर्षांपासून वाईट नजर ठेवत वारंवार बळजबरीने अत्याचार केल्याचे फिर्यादीत नोंदवली आहे. आरोपीने पिडीतेला कुटुंबाला संपवण्याची धमकी दिली होती.
मिळालेल्या माहितीनुसार, पीडित मुलगी इयत्ता आठवीत असल्यापासून हा प्रकार सुरू होता. आरोपी यशवंत थोरात हा पीडितेच्या शेजारीच राहत असल्याने दोन्ही कुटुंबांचे चांगले संबंध होते. पीडितेचा भाऊ आरोपीच्याच वारकरी शिक्षण संस्थेत सचिव म्हणून कार्यरत आहे. याचाच फायदा घेऊन आरोपीने 2021 पासून पीडितेवर वाईट नजर ठेवली होती. मुलगी घरी एकटी असताना किंवा आरोपीच्या घरी कोणी नसताना त्याने वारंवार तिच्यावर बळजबरीने शरीरसंबंध प्रस्थापित केले.पीडितेने विरोध करण्याचा प्रयत्न केला असता, तुझ्या आई-वडिलांना आणि भावाला मारून टाकीन’, अशी भीती आरोपी घालत होता. कुटुंबाच्या सुरक्षिततेसाठी पीडितेने हा छळ सहन केला.
या घटनेचा थरार १० मार्च २०२६ रोजी शिगेला पोहोचला. आरोपीने पीडितेला फोन करून त्याच्या घरी बोलावले. भीतीपोटी पीडिता त्याच्या घरी गेली असता, आरोपीने तिला कॉम्प्युटर रूममध्ये नेऊन बांबूने व चापटीने बेदम मारहाण केली. एवढ्यावरच न थांबता, नराधम आरोपीने स्वयंपाकात्ती लोखंडी पक्कड गॅसवर गरम करून पीडितेच्या चटके दिले. या अमानुष कृत्यानंतरही त्याने तिच्यावर बळजबरीने अत्याचार केला.
मारहाण आणि चटक्यांमुळे पीडितेला चालणेही कठीण झाले होते. १४ मार्च रोजी तिचा भाऊ घरी आला असता, तिला गंभीर अवस्थेत पाहून त्याने विश्वासात घेतले. मावस भावांच्या उपस्थितीत पीडितेने आपल्यावर झालेला पाच वर्षांचा अन्याय कथन केला. त्यानंतर पीडितेच्या भावाने पारनेर पोलीस ठाण्यात धाव घेऊन फिर्याद दिली.
पारनेर पोलिसांनी याप्रकरणी यशवंत एकनाथ थोरात विरुद्ध भारतीय न्याय संहिता आणि बाल लैंगिक अत्याचार प्रतिबंधक कायदा च्या विविध कलमान्वये गुन्हा दाखल केला आहे. पोलिसांनी आरोपी यशवंत महाराज थोरात याला ढवळपुरी येथून राहत्या घरातून अटक केली. न्यायालयासमोर हजर केले असता न्यायालयाने आरोपीला २० मार्च पर्यंत पोलीस कोठडीत ठेवण्याच्या आदेश दिले आहेत. त्यानुसार पुढील तपास पोलीस निरीक्षक संतोष खेडकर करत आहेत.
Discussion about this post