बँकिंग क्षेत्रात करिअर करू इच्छिणाऱ्या उमेदवारांसाठी मोठी संधी उपलब्ध झाली आहे. बँक ऑफ बडोदाने विविध व्यावसायिक पदांसाठी भरती जाहीर केली असून यासाठी पात्र उमेदवारांकडून अर्ज मागविले जात आहे. या भरती मोहिमेद्वारे 146 पदे भरली जाणार असून इच्छुक उमेदवारांना ऑनलाइन अर्ज करण्याची संधी देण्यात आली आहे.
या भरतीत वरिष्ठ रिलेशनशिप मॅनेजर, टेरिटरी हेड, वेल्थ स्ट्रॅटेजिस्ट, प्रायव्हेट बँकर आणि पोर्टफोलिओ रिसर्च अॅनालिस्ट यांसारख्या पदांचा समावेश आहे. देशभरातील शाखांमध्ये या पदांवर नियुक्त्या केल्या जाणार आहेत.
उपलब्ध पदांमध्ये सर्वाधिक संख्येने जागा वरिष्ठ रिलेशनशिप मॅनेजरसाठी ठेवण्यात आल्या आहेत. या पदासाठी एकूण 101 जागा आहेत. याशिवाय टेरिटरी हेडसाठी 17 पदे, वेल्थ स्ट्रॅटेजिस्टसाठी 18 पदे तसेच प्रायव्हेट बँकरसाठी 3 पदे उपलब्ध आहेत. इतर काही पदांसाठीही मर्यादित जागा खुल्या ठेवण्यात आल्या आहेत. इच्छुक उमेदवारांनी बँकेच्या अधिकृत संकेतस्थळावर जाऊन अर्ज सादर करणे आवश्यक आहे.
पात्रता, वयोमर्यादा
या भरतीसाठी अर्ज करणाऱ्या उमेदवारांनी मान्यताप्राप्त विद्यापीठातून पदवीधर असणे आवश्यक आहे. काही पदांसाठी एमबीए (MBA) पदवी असलेल्या उमेदवारांना प्राधान्य दिले जाऊ शकते. तसेच बँकिंग किंवा वित्तीय क्षेत्रातील अनुभव असलेल्या उमेदवारांना निवड प्रक्रियेत फायदा होण्याची शक्यता आहे.
वयोमर्यादेबाबत बोलायचे झाल्यास किमान वय 22 वर्षे आणि कमाल वय 57 वर्षे निश्चित करण्यात आले आहे. मात्र काही विशिष्ट पदांसाठी कमाल वयोमर्यादा 35 किंवा 45 वर्षे ठेवण्यात आली आहे. अर्ज शुल्कही वर्गानुसार वेगळे आहे. सामान्य, ओबीसी आणि आर्थिकदृष्ट्या दुर्बल घटकातील उमेदवारांना 600 रुपये शुल्क भरावे लागेल. तर अनुसूचित जाती, अनुसूचित जमाती, दिव्यांग आणि महिला उमेदवारांसाठी अर्ज शुल्क 100 रुपये ठेवण्यात आले आहे.
Discussion about this post