जळगाव । मुलगा पळवण्याच्या संशयातून जमावाकडून झालेल्या बेदम मारहाणीत जखमी झालेल्या तरुणाचा उपचारादरम्यान मृत्यू झाला. जळगाव तालुक्यातील आव्हाणे शिवारात सोमवारी (२३ फेब्रुवारी) रात्री ८ वाजता ही घटना घडली. या प्रकरणी जळगाव तालुका पोलिस ठाण्याचे अंमलदार श्रीकांत बदर यांच्या फिर्यादीवरून पाच जणांसह इतर संशयितांविरुद्ध खुनाच्या कलमान्वये गुन्हा दाखल करण्यात आला असून सर्व संशयितांना अटक करण्यात आली आहे.
या घटनेबाबत मिळालेल्या माहितीनुसार, जळगाव ते कानळदा रोडवरील आव्हाणे शिवारात ‘लक्ष्मी जिनिंग’ परिसरात सोमवारी (२३ फेब्रुवारी) रात्री ७ ते ८ वाजेच्या सुमारास एक अनोळखी तरुण वावरत होता. हा तरुण तिथे राहणारे मनोहर सोनवणे यांच्या ३ वर्षीय चिमुरड्याला पळवून नेत असल्याचा संशय काही स्थानिकांना आला. या संशयातुन जमावाने कोणत्याही प्रकारची खातरजमा न करता तरुणावर हल्ला चढवला. संतापलेल्या जमावाने त्याला जमिनीवर लोळवून बेदम मारहाण केली.
घटनेची माहिती मिळताच आव्हाणे गावचे सरपंच पिंटू पाटील यांनी पोलिसांना कळवले. जळगाव तालुका पोलीस ठाण्याचे पथक घटनास्थळी दाखल झाले तेव्हा तो तरुण रक्ताच्या थारोळ्यात पडलेला होता. पोलिसांनी त्याला तातडीने जिल्हा शासकीय रुग्णालयात दाखल केले. मात्र, डोक्याला आणि शरीराच्या अंतर्गत भागाला गंभीर दुखापत झाल्याने मंगळवारी पहाटे ४:३० वाजता त्याची प्राणज्योत मालवली.
याप्रकरणी पोलिसांनी फिर्यादीवरून गुन्हा दाखल केला असून पाच मुख्य संशयितांना ताब्यात घेतले आहे. यात मनोहर भगवान सोनवणे (रा. नांद्रा), अजय डोंगर कोळी (रा. थोरगव्हाण), प्रशांत उर्फ प्रकाश सोनवणे (रा. बामणोद), अजय उर्फ बादल सोनवणे (रा. बामणोद), अफताब आरिफ खाटीक (रा. शनिपेठ) यांचा समावेश आहे.
Discussion about this post