जळगाव । जळगाव जिल्हा पोलीस दलाच्या दक्षता पेट्रोल पंपावर कोट्यावधी रुपयांचा आर्थिक अपहार झाल्याचा धक्कादायक प्रकार समोर आला आहे. या पेट्रोल पंपावर व्यवस्थापक म्हणून नियुक्त केलेल्या पोलीस उपनिरीक्षकाकडूनच 1 कोटी 33 लाख 752 रुपयांचा आर्थिक अपहार करण्यात आला. याप्रकरणी अपहार करणाऱ्या पोलीस उपनिरीक्षक वाल्मीक मधुकर वाघ यांच्यावर जिल्हापेठ पोलीस ठाण्यात गुन्हा दाखल करण्यात आला आहे.
जळगाव जिल्हा पोलिस दलाच्या मानव संसाधन विभागामार्फत चालविल्या जाणाऱ्या भास्कर मार्केटसमोरील दक्षता पेट्रोलपंपाच्या दैनंदिन आर्थिक व्यवहारांची जबाबदारी वाल्मीक वाघ या उपनिरीक्षकाकडे सोपविण्यात आली होती. पेट्रोल, डिझेल विक्रीतून दररोज जमा होणारी रोख रक्कम त्याने स्टेट बँकेच्या संबंधित खात्यात नियमित जमा करणे आणि त्याचे अचूक जमाखर्चाची नोंद ठेवण्याची त्याची जबाबदारी होती. मात्र, ७ एप्रिल २०२५ पासून ते गुन्हा दाखल होईस्तोवर दहा महिन्याच्या कार्यकाळात त्याने हिशेबात हेरफेरी करून तब्बल १ कोटी ३३ लाख ७७२ रुपयांचा गैरव्यवहार केला आहे.
वाघ यांचा मुलगा शेखर वाघ याने १२ फेब्रुवारीला जिल्हा पोलिस अधीक्षक डॉ. महेश्वर रेड्डी यांची भेट घेऊन वडील कोणाला काहीही न सांगता बेपत्ता झाले आहे. तसेच त्यांनी पेट्रोलपंपाच्या हिशेबात मोठी गडबड झाली असून, मी त्यात पूर्णपणे अडकलो असल्याचे पत्राद्वारे कळविल्याचे सांगितले. या माहितीच्या आधारे पोलिस अधीक्षकांनी तत्काळ पेट्रोलपंपावरील व्यवहारांची खात्री करण्याचे आदेश मानवसंसाधन विभागाचे प्रभारी संदीप पाटील यांना दिले. तपासणीवेळी पेट्रोलपंपाच्या तिजोरीत केवळ १ लाख ९६ हजार २१९ रुपये आढळले. मात्र बँकेत भरणा केल्याचे पावती पुस्तक व इतर दस्ताऐवज तेथे नव्हते. त्यामुळे पंपाचे लेखापरीक्षण करण्याचेही आदेश देण्यात आले.
लेखापाल एस. आर. पलोड यांनी १ एप्रिल २०२५ ते ९ फेब्रुवारी २०२६ या कालावधीचे लेखापरीक्षण केले असता एकूण ४ कोटी ९३ लाख ७३ हजार ६८६ रुपयांची रोख विक्री झाली व त्यापैकी ३ कोटी ५९ लाख २५ हजार १८ रुपये बँकेत प्रत्यक्ष जमा केले. मात्र उर्वरित १ कोटी ३३ लाख ७५२ रुपयांचा गैरव्यवहार झाल्याचे समोर आले.
गुन्हा दाखल
या प्रकरणी प्रभारी संदीप पाटील यांनी जिल्हा पेठ पोलिस ठाण्यात फिर्याद दिली. त्यावरून वाल्मीक वाघ याच्याविरुद्ध गुन्हा दाखल करण्यात आला आहे. पुढील तपास स्थानिक गुन्हे शाखेचे पोलिस निरीक्षक राहुल गायकवाड करीत आहेत. वाघ हे सध्या पसार असून, त्यांच्या शोधासाठी विशेष पथके रवाना करण्यात आली आहेत. तसेच त्यांच्या मालमत्ता जप्तीची प्रक्रियादेखील तांत्रिक पुराव्यांच्या आधारे सुरू करण्यात आली आहे.
विशेष म्हणजे अपहार करणारा पोलीस उपनिरीक्षक सात दिवसांपासून बेपत्ता असून याबाबत पोलीस ठाण्यात नोंद करण्यात आली आहे. अपहार केल्याबद्दल भीती वाटल्याने पोलीस निरीक्षकाने आत्महत्या करत असल्याची चिठ्ठी लिहून बेपत्ता झाल्याची माहिती देखील समोर आली आहे.
Discussion about this post