जळगाव । राज्याच्या दिव्यांग सक्षमीकरण विभागाच्या आदेशानुसार राज्यातील दिव्यांग कर्मचारी व दिव्यांग व्यक्तींच्या दिव्यांग प्रमाणपत्राची तपासणी मोहीम हाती घेण्यात आली आहे. या तपासणीत जळगाव जिल्हा परिषदेतील काही अधिकारी व कर्मचाऱ्यांना निलंबित करण्यात आले आहे.निकषानुसार टक्केवारीत तफावत आढळून आल्याने मुख्य कार्यकारी अधिकारी मिनल करनवाल यांनी आणखी चार कर्मचारी निलंबित केले आहे. यामुळे आतापर्यंत ८ जणांवर निलंबनाची कारवाई केली आहे.
राज्य शासनाच्या दिव्यांग कल्याण विभागाच्या निर्देशानुसार दिव्यांग कर्मचाऱ्यांचे युआयडी कार्ड व प्रमाणपत्रांची गेल्या काही दिवसांपासून सखोल पडताळणी मोहीम राबविण्यात येत आहे. या मोहिमेचा उद्देश दिव्यांगत्वाच्या सवलती, शासकीय लाभ व आरक्षणाचा लाभ केवळ पात्र आणि खऱ्या गरजू व्यक्तींनाच मिळावा, हा आहे. या पार्श्वभूमीवर राज्यभरातील विविध शासकीय, निमशासकीय कार्यालयांमधील दिव्यांग कर्मचाऱ्यांची कडक तपासणी करण्यात येत असून, जळगाव जिल्हा परिषदेतील विविध आस्थापनांवर कार्यरत असलेल्या अधिकारी व कर्मचाऱ्यांचीही काही दिवसांपासून तपासणी सुरू आहे.
या तपासणीअंतर्गत संबंधित कर्मचाऱ्यांची कागदपत्रे, दिव्यांग प्रमाणपत्रांवरील नोंदी, युआयडी कार्डमधील माहिती तसेच प्रत्यक्ष वैद्यकीय तपासणी अहवाल यांची तुलना करण्यात येत आहे. तपासणीदरम्यान काही कर्मचाऱ्यांच्या दिव्यांग प्रमाणपत्रांमध्ये नमूद असलेली दिव्यांगत्वाची टक्केवारी आणि तज्ज्ञ वैद्यकीय अधिकाऱ्यांच्या प्रत्यक्ष तपासणीत नोंदविण्यात आलेले निष्कर्ष यामध्ये लक्षणीय तफावत आढळून आली आहे.
काही प्रकरणांत प्रमाणपत्रांवर दर्शविण्यात आलेली टक्केवारी प्रत्यक्ष तपासणीच्या निकषांशी जुळत नसल्याचे देखील दिसून आले आहे. या गंभीर बाबीची दखल घेत जळगाव जिल्हा परिषदेतील अधिकारी व कर्मचाऱ्यांना निलंबित करण्यात आले आहे.
भालचंद्र नारायण पवार,आरोग्य सहाय्यक जिल्हा प्रशिक्षण केंद्र जळगाव, छाया घनश्याम भोळे,आरोग्य सहाय्यक प्राथमिक आरोग्य केंद्र वाघोड,संदीप विनायक सोनवणे, आरोग्य सेवक प्राथमिक आरोग्य केंद्र तरवडे ता. चाळीसगाव व गणेश मुरलीधर महाजन, आरोग्य सहाय्यक पिंपरखेड ता. भडगाव या चौघांच्या तपासणी दरम्यान तफावत आढळून आली असल्याने चौघाविरूध्द निलंबनाची कारवाई करण्यात आली आहे.
या पूर्वी देखील दिव्यांग कर्मचारी तपासणीत टक्केवारी तपासणीत तफावत आढळून आलेल्या चार कर्मचाऱ्यावर निलंबनाची कारवाई करण्यात आली आहे. त्यामुळे ही संख्या ८ झाली आहे. आणखी काही कर्मचारी निलंबनाच्या वाटेवर आहेत.
Discussion about this post