जळगाव । बोगस दिव्यांग प्रमाणपत्र प्रकरणात जळगाव जिल्हा परिषदेतील आणखी एका कर्मचाऱ्याला निलंबित करण्यात आले आहे. वरिष्ठ सहाय्यकाचे बोगस प्रमाणपत्र उघड झाल्याने मुख्य कार्यकारी अधिकारी मिनल करनवाल यांनी संबंधित कर्मचाऱ्याला तडकाफडकी निलंबित केले आहे. यामुळे आतापर्यंत तीन कर्मचाऱ्यांचे निलंबित झाले आहे.
बोदवड पंचायत समिती अंतर्गत ग्रामीण पाणीपुरवठा उपविभागात शंकर वाघमारे हे वरिष्ठ सहाय्यक म्हणून कार्यरत आहेत. त्यांची नियुक्ती दिव्यांग प्रवर्गातून (आरक्षणातून) करण्यात आली होती. शासनाच्या धोरणानुसार, त्यांच्या प्रमाणपत्राची सत्यता पडताळण्यासाठी त्यांना जळगाव येथील शासकीय वैद्यकीय महाविद्यालय व रुग्णालयात तपासणीसाठी पाचारण करण्यात आले होते. यामध्ये वाघमारे यांनी नोकरी मिळवताना सादर केलेल्या प्रमाणपत्रावरील दिव्यांगत्वाची टक्केवारी आणि प्रत्यक्ष तपासणीत आढळलेली टक्केवारी यात मोठी तफावत आढळून आली.
दिव्यांगत्वासाठी आवश्यक असलेले किमान निकषही या तपासणीत पूर्ण होत नसल्याचे स्पष्ट झाले.शासनाची दिशाभूल करून आणि खोटे पुरावे सादर करून नोकरी मिळवल्याचा ठपका ठेवत, मुख्य कार्यकारी अधिकारी मिनल करनवाल यांनी शंकर वाघमारे यांच्या निलंबनाचे आदेश काढले.
जळगाव जिल्हा परिषदेत आतापर्यंत बोगस दिव्यांग प्रमाणपत्र प्रकरणी झालेली ही तिसरी कारवाई आहे. यापूर्वी दोन कर्मचाऱ्यांवर अशाच प्रकारे निलंबनाची कुऱ्हाड कोसळली आहे.
Discussion about this post