जळगाव । जळगाव जिल्हा पत्रकार संघाच्या वतीने पत्रकार दिनानिमित्त ६ जानेवारी २०२६ रोजी जिल्ह्यातील सर्व पत्रकारांसाठी विशेष कार्यक्रमांचे आयोजन करण्यात आले आहे. मंगळवारी सकाळी ११ वाजता जिल्हा पत्रकार संघाच्या सभागृहात मुख्य कार्यक्रमास सुरुवात होणार असून त्यापूर्वी सकाळी १०.३० वाजता सर्वसाधारण सभा आयोजित करण्यात आली आहे.
जळगाव जिल्हा पत्रकार संघाचे अध्यक्ष विजय बापू पाटील यांच्या अध्यक्षतेखाली हा कार्यक्रम होणार आहे. कार्यक्रमात ज्येष्ठ समाजसेवक संदीप खोरपडे आणि जिल्हा माहिती अधिकारी जळगाव रविंद्र ठाकुर हे वक्ते म्हणून सहभागी होणार आहेत. तर कवयित्री बहिणाबाई चौधरी उत्तर महाराष्ट्र विद्यापीठ जळगाव, माध्यमशास्त्र प्रशाळेचे निवृत्त संचालक व प्राध्यापक सुधीर भटकर हे प्रमुख पाहुणे म्हणून उपस्थित राहणार आहेत.
या निमित्ताने जिल्ह्यातील ग्रामीण पत्रकार बंधू-भगिनींसाठी आरोग्य तपासणी शिबिर तसेच रक्तदान शिबिराचेही आयोजन करण्यात आले आहे. आरोग्य तपासणी शिबिरासाठी डॉक्टर नितीन धांडे आणि मुकुंद गोसावी यांचे सहकार्य लाभणार आहे.
आरोग्य शिबिरासाठी सहभागी होऊ इच्छिणाऱ्या पत्रकारांनी आपली नावे जळगाव जिल्हा पत्रकार संघाकडे नोंदवावीत, असे आवाहन करण्यात आले आहे. नोंदणीसाठी अशोक भाटीया (मो. ९४०४०५०३०८) यांच्याशी संपर्क साधण्याचे कळविण्यात आले आहे.
या कार्यक्रमाला जिल्ह्यातील ज्येष्ठ पत्रकार, छायाचित्रकार, इलेक्ट्रॉनिक मीडिया, सोशल मीडिया प्रतिनिधी तसेच तालुका पत्रकार संघांचे अध्यक्ष यांनी मोठ्या संख्येने उपस्थित राहावे, असे आवाहन जळगाव जिल्हा पत्रकार संघाच्या पदाधिकाऱ्यांनी केले आहे.
Discussion about this post