जळगाव । सोने आणि चांदी खरेदी करणाऱ्या ग्राहकांसाठी महत्वाची बातमी आहे. जळगाव शहरातील सुवर्ण बाजारपेठेत सलग तिसऱ्या दिवशी सोने दरात वाढ झाली. आज बुधवारी सकाळी बाजार उघडल्यावर सोने दरात वाढ नोंदवली गेली असून, यांनतर सोन्याने एक लाख ४० हजार रूपयांचा टप्पा ओलांडला आहे. दरवाढीमुळे हाहाकार उडाल्याच्या पार्श्वभूमीवर दागिने खरेदीसाठी आलेल्या ग्राहकांच्याही तोंडचे पाणी पळाले.
जळगाव शहरातील सुवर्ण बाजारपेठेत आज सकाळी बाजार उघडल्यावर पुन्हा ६१८ रूपयांची वाढ नोंदवली गेली. त्यामुळे सोन्याने जीएसटीसह प्रति १० ग्रॅम एक लाख ४० हजार ९०४ रूपयांचा सर्वकालीन उच्चांक केला. यापूर्वी सोमवारी १९५७ रूपयांची वाढ नोंदवली गेल्याने २४ कॅरेट सोने तीन टक्के जीएसटीसह प्रति १० ग्रॅम एक लाख ३८ हजार रूपयांच्या उच्चांकापर्यंत पोहोचले होते. मंगळवारी दिवसभरात आणखी २२६६ रूपयांची वाढ नोंदवली गेली. त्यामुळे सोन्याने जीएसटीसह प्रति १० ग्रॅम एक लाख ४० हजार २८६ रूपयांचा सर्वकालीन उच्चांक केला होता यानंतर आज पुन्हा दरवाढ झाली.
दरवाढी मागचे कारण काय?
गेल्या काही महिन्यांपासून जागतिक पातळीवर भू-राजकीय अनिश्चितता वाढताना दिसत आहे. विविध भागांतील संघर्ष, राजकीय अस्थिरता, तसेच आंतरराष्ट्रीय व्यापारावर पडलेले ताण यामुळे गुंतवणूकदारांमध्ये अस्वस्थता आहे. अशा काळात परंपरेने सुरक्षित गुंतवणूक मानल्या जाणाऱ्या सोन्याकडे गुंतवणूकदारांचा ओघ वाढतो. त्याचाच परिणाम म्हणून अलीकडे सोन्याच्या किमतींमध्ये झपाट्याने वाढ झाली आहे.
Discussion about this post