जळगाव । जळगाव जिल्ह्यात वाळू तस्करांची मुजोरी वाढली आहे. याच दरम्यान अमळनेर तालुक्यातील मांडळ येथे महसूल अधिकाऱ्यासह कर्मचाऱ्यांना मारहाण करत गावठी कट्टा लावत अवैध वाळूची वाहतूक करणारे जेसीबी आणि ट्रॅक्टर पळवून नेल्याची घटना समोर आली आहे. मंडळाधिकारी पुरुषोत्तम पाटील, ग्राममहसूल अधिकारी जितेंद्र पाटील अशी मारहाण झालेल्या कर्मचारी व अधिकाऱ्यांची नावे आहेत. या प्रकरणी अज्ञात १० ते १५ जणांविरुद्ध गुन्हा नोंदविण्यात आला आहे.
मांडळ येथे अवैध वाळू वाहतूक सुरू असल्याचे समजताच उपविभागीय अधिकारी मयूर भंगाळे यांनी तहसीलदार रुपेशकुमार सुराणा यांना कारवाई साठी पथक पाठवण्याचे आदेश दिले. मंडळाधिकारी पुरुषोत्तम पाटील, ग्राम महसूल अधिकारी संदीप माळी, जितेंद्र पाटील, मधुकर पाटील, पवनकुमार शिंगारे, दीपक पाटील हे मध्यरात्री मांडळ येथे पांझरा नदीत गाव विहिरीजवळ पोहोचले असता त्यांना तेथे जेसीबी क्रमांक एमएच १५, बी डब्ल्यू ९४५९ हे निळ्या रंगाच्या ट्रॅक्टर मध्ये वाळू भरत होते. आणि हिरव्या रंगाचे ट्रॅक्टर वाळूने भरलेले होते. त्यांना वाळू वाहतुकीचा परवाना आहे का असे विचारून सर्व वाहने अमळनेर येथे नेण्यास सांगितले.
या दरम्यान, अचानक पाच ते सहा जण दुचाकीवरून आले आणि त्यांनी महसूल विभागाच्या पथकाला धमकावले. त्यांच्यात नंतर दहा-बारा जण लाठ्या-काठ्यांसह सामील झाले. हल्लेखोरांनी आधी महसूल अधिकाऱ्यांना शिवीगाळ करून मारहाण केली. एका संशयिताने महसूल अधिकारी जितेंद्र पाटील यांच्या डोळ्यात मिरचीची स्प्रे मारला, तर दुसऱ्याने त्यांच्या पायावर काठीचा प्रहार केला. आणखी एका हल्लेखोराने मंडळाधिकारी पुरुषोत्तम पाटील यांच्या कपाळावर गावठी बंदूक लावून जीवे मारण्याची धमकी दिली.
हल्ल्यानंतर सर्व वाळू माफियांनी एकत्र येत दोन्ही ट्रॅक्टर पळवून नेले. या प्रकरणी पुरुषोत्तम पाटील यांनी मारवड पोलिस ठाण्यात तक्रार दाखल केली असून, अज्ञात १० ते १५ जणांविरुद्ध गुन्हा नोंदविण्यात आला आहे. या घटनेचा महसूल अधिकारी आणि कर्मचारी संघटनेने तीव्र निषेध नोंदवला आहे. तसेच दोषींवर मकोका अंतर्गत कारवाई करण्याची मागणी केली आहे.
Discussion about this post