जळगाव । उपमुख्यमंत्री अजित पवार यांचे सुपुत्र पार्थ पवार यांच्यावर १८०० कोटींच्या कथित जमीन घोटाळ्याचे आरोप झाल्यानंतर राजकीय वातावरण तापले असून याप्रकरणावर शरद पवार गटाचे ज्येष्ठ नेते एकनाथ खडसे यांनी प्रतिक्रिया देत या प्रकरणाची चौकशी होईपर्यंत उपमुख्यमंत्री अजित पवार यांनी आपल्या पदाचा राजीनामा द्यावा, अशी मागणी केली आहे.
खडसे यांनी पत्रकार परिषदेत सांगितले की, या व्यवहारात मोठ्या प्रमाणावर बनवाबनवी झाली आहे. ही जमीन महारवतनाची आहे आणि अशा जमिनीच्या खरेदीसाठी महसूल आयुक्तांची परवानगी आवश्यक असते. मात्र, या व्यवहारात अशी कोणतीही परवानगी घेतल्याचे दिसत नाही. त्यामुळे हा व्यवहार बेकायदा असल्याचे स्पष्ट होत असून तो तत्काळ रद्द केला पाहिजे, अशी मागणी खडसे यांनी केली.
जमीन खरेदी करणाऱ्या पार्थ पवार यांच्या कंपनीचे भागभांडवल केवळ एक लाख रुपये आहे, मग 300 कोटी रुपयांची जमीन खरेदी करण्यासाठी इतका मोठा निधी आला कुठून? कोणत्या खात्यातून पैसे दिले गेले आणि हे पैसे कोणाच्या खात्यात जमा झाले, हे तपासणं आवश्यक आहे.
माजी महसूलमंत्री म्हणून आपल्या कार्यकाळाचा दाखला देत खडसे म्हणाले, जेव्हा माझ्या कुटुंबावर आरोप झाले होते, तेव्हा विरोधकांनी मोठा गदारोळ केला होता. पण आता या प्रकरणात अजित पवार यांच्या मुलाचं नाव समोर येत असूनही ते मौन बाळगून आहेत. सरकार आपल्याच सहकाऱ्याच्या मुलाच्या कंपनीची चौकशी करणार आहे, हे लोकांनाही पटणार नाही. त्यामुळे या प्रकरणाची चौकशी हायकोर्टाच्या न्यायाधीशांकडून करण्यात यावी, आणि संपूर्ण प्रकरणाची पारदर्शक चौकशी होऊन सत्य बाहेर यावं, अशी मागणी त्यांनी केली.
जोपर्यंत चौकशी होत नाही, तथ्य बाहेर येत नाही तोपर्यंत अजित पवार यांनी राजीनामा दिला पाहिजे, अशी मागणी एकनाथ खडसे यांनी केली. देवेंद्र फडणवीस यांनी ही गोष्ट खरी आहे. चौकशीत प्रशासनिक कारवाई होईल. या व्यवहार ज्याच्या आशीर्वादानं झाला त्याच्यावर काय कारवाई करणार आहात, असा सवाल एकनाथ खडसे यांनी केली.
Discussion about this post