जळगाव । जळगाव शहरातील एमआयडीसी परिसरामधील एका कंपनीबाहेर गोळीबार झाल्याची धक्कादायक घटना उघडकीस आली आहे. यात अवैध दारुअड्ड्यावर किरकोळ कारणावरून गावठी बंदुकीतून सहा राउंड बेछूटपणे फायर करण्यात आले. यात कंपनीतील दोन कामगावर जखमी झाले असून, त्यातील एका कामगाराची प्रकृती गंभीर आहे. एमआयडीसी, जी-सेक्टर 12 मधील ‘विजेता इलेक्ट्रॉनिक्स’ नावाच्या कंपनीजवळ हा प्रकार घडला, ज्यामुळे परिसरात मोठी खळबळ उडाली आहे.
मिळालेल्या माहितीनुसार, सरफू शेख नावाचा कामगार कामावर जात असताना कंपनीजवळील एका टपरीवर सुरू असलेल्या अवैध दारू अड्ड्यावर चालकाला मारहाण होताना त्याने पाहिले. दारू विक्रेत्याने सरफू शेख यालाही मारहाण करण्यास सुरुवात केली.
मारहाण झाल्यानंतर सरफू शेख याने मदतीसाठी कंपनीत काम करणारे त्याचे दोघे भाऊ, राजन शेख आणि अहमद फिरोज शेख यांना बोलावले. दोन्ही भाऊ कंपनीच्या बाहेर येताच दारू विक्रेत्याने त्यांना शिवीगाळ केली आणि तेथे उपस्थित असलेल्या एका महिलेने त्याला गावठी पिस्तूल दिले.पिस्तूल हातात येताच दारू विक्रेत्याने कामगारांच्या दिशेने चार ते पाच राऊंड फायर केले. या गोळीबारात राजन शेख रफीउल्ला आणि अहमद फिरोज शेख हे दोघे गंभीर जखमी झाले आहेत.
घटनेनंतर पोलिसांनी घटनास्थळाची पाहणी केली असता, दोन रिकाम्या पुंगळ्या (फायर झालेले राऊंड) आणि दोन जिवंत काडतुसे मिळाली आहेत. या प्रकरणी एमआयडीसी पोलीस ठाण्यात गुन्हा नोंद करण्यात आला आहे. आरोपी राहुल बऱ्हाटे आणि त्याची साथीदार मोनाली राहुल बऱ्हाटे या दोघांचा पोलीस कसून शोध घेत असून, आरोपींना पकडण्यासाठी पथके रवाना करण्यात आल्याची माहिती अधिकाऱ्यांनी दिली आहे.
Discussion about this post