जळगाव । जळगाव जिल्ह्यात लाचखोरीच्या घटना वाढताना दिसत असून अशातच अमळनेर तालुक्यातील ग्रामीण पाणीपुरवठा विभागाचे उपविभागीय अभियंता दिलीप पाटील याला ४ हजार रुपयांची लाच स्वीकारताना एसीबीने रंगेहाथ पकडण्यात आले. या कारवाईमुळे लाचखोरांमध्ये खळबळ उडाली आहे.
मिळालेल्या माहितीनुसार, अमळनेर येथील ग्रामीण पाणीपुरवठा विभागाचे उपविभागीय अभियंता दिलीप पाटील यांच्याकडे धरणगाव ग्रामीण पाणीपुरवठा विभागाचाही अतिरिक्त पदभार होता. याच धरणगाव विभागातील एका प्रकरणाच्या मंजुरीसाठी अभियंता पाटील यांनी तक्रारदाराकडे चक्क ४ हजार रुपयांची लाच मागितली होती.पाटील यांनी केलेल्या या मागणीमुळे तक्रारदाराने तातडीने लाच देण्यास नकार दिला आणि थेट लाचलुचपत प्रतिबंधक विभागाकडे तक्रार दाखल केली.
तक्रारीची शहानिशा होताच, नंदुरबार आणि जळगाव विभागाच्या लाचलुचपत प्रतिबंधक विभागाने (ACB) संयुक्तपणे सापळा रचण्याची योजना आखली. त्यानुसार, बुधवारी सायंकाळी ५ वाजेच्या सुमारास सापळा कार्यवाही करण्यात आली तक्रारदार लाचेची रक्कम घेऊन अभियंता दिलीप पाटील यांच्याकडे गेला असता, त्यांनी ती स्वीकारली. नेमक्या याच वेळी दबा धरून बसलेल्या एसीबीच्या पथकाने उपविभागीय अभियंता दिलीप पाटील याला ४ हजार रुपयांची लाच स्वीकारताना रंगेहाथ पकडले. पुढील तपास: दिलीप पाटील यांच्यावर भ्रष्टाचार प्रतिबंधक कायद्यानुसार गुन्हा दाखल करण्याची प्रक्रिया रात्री उशिरापर्यंत सुरू होती. एसीबीचे पथक या प्रकरणी अधिक तपास करत आहे.
Discussion about this post