पुणे । ज्येष्ठ नेते एकनाथ खडसे यांचे जावई आणि शरद पवारांच्या राष्ट्रवादीच्या महिला प्रदेशाध्यक्षा रोहिणी खडसे यांचे पती प्रांजल खेवलकर यांच्या अडचणीत मोठी वाढ होण्याची शक्यता आहे. पुण्यातील रेव्ह पार्टी प्रकरणाच्या तपासासाठी महिला आयोगाने विशेष तपास पथक (SIT) गठीत करण्याचे निर्देश दिले आहेत.
राज्य महिला आयोग गेल्या चार वर्षांपासून मानवी तस्करी आणि महिलांवरील अन्याय या गंभीर मुद्यांवर काम करत आहे. आयोगाच्या अध्यक्षा रूपाली चाकणकर यांनी माहिती दिली की, खेवलकरांच्या रेव्ह पार्टी प्रकरणात 250–300 पेक्षा अधिक महिलांना आमिष दाखवून फसवण्यात आले. या पार्टीदरम्यान मोबाईल आणि लॅपटॉपमधून अत्यंत अश्लील व्हिडीओ मिळाल्याचे स्पष्ट झाले आहे.
या धक्कादायक प्रकरणात पीडित महिलांनी तक्रारी दाखल केल्या आहेत. या सर्व तक्रारींच्या आधारे पुणे पोलीस आयुक्तांना कारवाई करण्याच्या स्पष्ट सूचना आयोगाने दिल्या आहेत. प्रकरणाचा तपास केवळ वरवर न होता, सखोल व्हावा यासाठीच SIT गठीत करण्याची मागणी करण्यात आली आहे.
तर या प्रकरणाचा संबंध ह्युमन ट्रॅफिकिंग रॅकेटशी असू शकतो. पार्टीसाठी आणलेल्या महिलांचा गैरवापर झाला असावा. भविष्यातही अशाच पद्धतीने महिलांची फसवणूक होऊ नये, यासाठी कठोर उपाययोजना करण्याची गरज आहे, चाकणकर यांनी म्हटलं आहे. त्यामुळे आता आधीच अडचणीत आलेले खडसेंचे जावई खेवलकर यांच्या अडचणीत आणखी वाढ होण्याची शक्यता आहे.
Discussion about this post