काँग्रेस आमदाराला ईडीने ठोकल्या बेड्या; कोट्यवधी रुपयाच्या कॅशसह सोने चांदी जप्त

बंगळुरू : अंमलबजावणी संचालनालयाने (ईडी) कर्नाटकातील काँग्रेस आमदार केसी वीरेंद्र यांना अटक केली. गंगटोकमध्ये बेकायदेशीर ऑनलाइन आणि ऑफलाइन सट्टेबाजीत सहभागी असल्याच्या आरोपाखाली केसी वीरेंद्र यांना अटक करण्यात आली आहे. १२ कोटी रूपयांची रोख कॅश आणि ६ कोटी रूपयांच्या किंमतीचे सोने-चांदीचे दागिने आणि चार गाड्या ईडीने जप्त केल्या आहेत.

ईडीच्या तपासात समोर आले आहे की, वीरेंद्र अनेक ऑनलाइन सट्टेबाजी साइट्स चालवत होते. छापेमारीदरम्यान वीरेंद्र यांच्या ठिकाणांवरून 12 कोटी रुपये रोख, यामध्ये 1 कोटी रुपयांची परदेशी चलने, 6 कोटी रुपयांचे सोन्याचे दागिने आणि 10 किलो चांदी जप्त करण्यात आली आहे. याशिवाय, अनेक लक्झरी गाड्याही ताब्यात घेण्यात आल्या आहेत.

गंगटोकमधून अटक, 30 ठिकाणांवर छापेमारी –
ईडीने वीरेंद्र यांना सिक्कीममधील गंगटोक येथून अटक केली. सूत्रांनुसार, वीरेंद्र काही सहकाऱ्यांसह गंगटोकमध्ये कॅसिनोसाठी जमीन भाडेतत्त्वावर घेण्यासाठी गेले होते. ईडीने त्यांच्या 30 ठिकाणांवर छापेमारी केली, ज्यामध्ये त्यांचे भाऊ के.सी. थिप्पेस्वामी, के.सी. नागराज आणि मुलगा पृथ्वी एन. राज यांच्या परिसरातून महत्त्वाची कागदपत्रे जप्त करण्यात आली. तपासादरम्यान 17 बँक खाती आणि दोन बँक लॉकर्स फ्रीज करण्यात आली आहेत. ईडीच्या मते, वीरेंद्र यांचा भाऊ के.सी. थिप्पेस्वामीदेखील या प्रकरणात सहभागी आहे.

काही दिवसांपूर्वी ईडीने कर्नाटकातील आणखी एक काँग्रेस आमदार सतीश कृष्ण सैल यांच्या घरावर आणि इतर ठिकाणांवर छापेमारी केली होती. कारवार-अंकोला मतदारसंघातील या आमदाराच्या ठिकाणांवरून 1.7 कोटी रुपये रोख आणि 6.8 किलो सोने जप्त करण्यात आले होते.