अमळनेर । अमळनेरातील गांधलीपुरा भागात सुरु असलेल्या कुंटनखाण्यावर पोलिसांनी अचानक छापा टाकत मोठी कारवाई केली आहे. पोलिसांनी केलेल्या कारवाईत ३ दलाल महिलांना अटक करण्यात आली असून इतर महिलांची सुटका करण्यात आली आहे. पोलिसांनी कुंटनखाना सुरु असलेल्या घरातून काही ग्राहकांना देखील ताब्यात घेतले असून त्याठिकाणी ४१ निरोध मिळून आले आहे.
अमळनेर येथील गांधलीपुरा तांबोळी टॉकीज जवळील कुंटणखाना काही महिन्यांपासून चांगलंच चर्चेत आहे. स्थानिक नागरिक, राजकारणी आणि वेश्या व्यवसाय करणाऱ्या हरदासी यांच्यातील वाद चांगलाच चिघळला आहे. वेश्या व्यवसाय बंद करण्यासाठी न्यायालयात आणि जिल्हा प्रशासनाकडे देखील अनेकदा तक्रार करण्यात आली आहे.
अमळनेर पोलीस ठाण्याचा पदभार स्वीकारलेले नूतन पोलीस निरीक्षक दत्तात्रय निकम यांच्या पथकाने मंगळवारी गांधलीपुरा भागात धडक कारवाई करून छापा टाकला. यात तीन खोलीत ६ पीडित महिला आणि ८ साक्षीदार ग्राहक मिळून आले. पोलिसांनी खोलीतून ४१ निरोध हस्तगत केले आहे. दलाल महिला ग्राहकांकडून १००० रुपये घेऊन पीडित महिलांना ५०० रुपये देऊन वेश्या व्यवसाय करून घेत असल्याची माहिती समोर आली आहे.
अमळनेर पोलीस ठाण्यात पोलीस उपनिरीक्षक नामदेव बोरकर यांच्या फिर्यादीवरून पीडित महिलांना आमिष देऊन त्यांच्याकडून वेश्या व्यवसाय करून घेत असल्याप्रकरणी जुमाबाई (पूर्ण नाव माहिती नाही), शशिकला मदन बडगुजर, मीना दीपक मिस्तरी सर्व रा.अमळनेर यांच्याविरुद्ध स्त्रिया व मुलींचे अनैतिक व्यापारास प्रतिबंधक कायद्यानुसार गुन्हा दाखल करण्यात आला आहे.
Discussion about this post