चोपडा । तालुक्यातील अनवर्दे – बुधगांव येथे निवडणुकीचे काम संपवून दुचाकीने घरी परतणाऱ्या शिक्षकाच्या दुचाकीला अज्ञात वाहनाने धडक दिली. त्यात त्यांचा जागीच मृत्यू झाला. बुधवारी रात्री सात वाजेच्या सुमारास ही घटना घडली.
लक्ष्मीकांत वासुदेव पाटील (वय ४९, रा. बभळाज, ता. शिरपूर) असे या शिक्षकाचे नाव आहे. चोपडा तालुक्यातील अनवर्दे-बुधगाव येथे उपशिक्षक म्हणून ते कार्यरत होते. त्याच ठिकाणी त्यांची मतदान केंद्रस्तरीय अधिकारी म्हणून नियुक्ती केली होती. तेथे निवडणुकीचे मतदान आटोपून सायंकाळी दुचाकीने ते घराकडे निघाले होते. गलंगी गावाजवळ रात्री सात वाजेच्या सुमारास त्यांच्या दुचाकीला अज्ञात वाहनाने धडक दिली
त्यांना नागरिकांनी चोपडा उपजिल्हा रुग्णालयात उपचारासाठी दाखल केले असता तेथे त्यांना मयत घोषित करण्यात आले. घटनेची माहिती मिळताच जिल्हा निवडणूक अधिकारी आयुष प्रसाद आणि जिल्हा परिषदेचे मुख्य कार्यकारी अधिकारी अंकित यांनी घटनेबद्दल शोक व्यक्त केला आहे. दरम्यान घटनेबद्दल चोपडा ग्रामीण पोलीस स्टेशनला नोंद घेण्याचे काम सुरू होते. या घटनेमुळे लक्ष्मीकांत पाटील यांच्या परिवारावर शोककळा पसरली आहे.
Discussion about this post