जळगाव : कारवरील चालकाचा ताबा सुटल्याने कार रस्त्याच्या कडेला सुमारे ५०० फूट फेकली जाऊन चारवेळा उलटली. यात धुळे येथील दोन जण ठार तर दोन जण गंभीर जखमी झाले. ही घटना राष्ट्रीय महामार्ग क्रमांक ६ वर विचखेडे, ता. पारोळानजीक घडली.
नीलेश सुरेश पाटील (२५), राहुल भाऊसाहेब आहिरे (२४, दोघे रा. तरवाडे, ता. जि. धुळे) अशी ठार झालेल्यांची नावे आहेत. कार क्र. एमएच १९ सीएफ ११९० ने नीलेश पाटील, राहूल पाटील तसेच गोविंद भास्कर राठोड (२६, रा. तरवाडे) आणि महेश आत्माराम देवरे पाटील (२४, मोंढाळे प्र. अ. ता. पारोळा) हे चारही जण पारोळ्याकडून धुळ्याकडे जात होते.
पारोळा शहरापासून चार किमी अंतरावर असलेल्या विचखेडा गावाजवळ भरधाव वेगाने जाणाऱ्या कारवरील चालकाचा ताबा सुटला आणि कार रस्त्याच्याकडेला जाऊन चार वेळा उलटली. त्यात राहुल हा जागीच ठार झाला तर नीलेश पाटील याला धुळे येथे उपचारासाठी घेऊन जात असताना वाटेतच त्याचा मृत्यू झाला. उर्वरित दोघे गंभीररित्या जखमी झाले आहेत. त्यांना पारोळा कुटीर रुग्णालयात दाखल करण्यात आले. जखमींपैकी गोविंदा राठोड हे गंभीर असल्याने त्यांना धुळे येथे हलविण्यात आले आहे.
Discussion about this post