जळगाव । जळगावातील बेरोजगार तरुणांसाठी आनंदाची बातमी आहे. लवकरच जिल्हा परिषद जळगाव मध्ये वर्ग तीनच्या विविध पदांवर भरती होणार आहे. तब्बल 619 जागांवर भरती होणार आहे. भरतीसाठी पदे मंजूर झाली असली तरी या विषयीची अधिसूचना अद्यापही प्राप्त नाही. यासह वेळापत्रकही अद्याप जाहीर केलेले नाही.
राज्यातील विविध जिल्हा परिषदेतील रिक्त पदांवर लवकर भरती होणार आहे. त्यानुसार जळगाव जिल्हा परिषदेमार्फत एकूण 619 जागांवर भरती होणार आहे. सरळसेवेतून ऑनलाइन परीक्षा होऊन आयबीपीएस कंपनीला परीक्षेचे कार्य देण्यात आले आहे. राज्यभरातील भरतीचे नियंत्रण पुणे जिल्हा परिषद अंतर्गत केले जाणार आहे.
भरण्यात येणारी पदे कोणती?
जळगाव जिल्हा परिषदेत एकूण ६१९ जागांवर भरती केली जाणार आहे. त्यामध्ये आरोग्य सेवक महिला २९१, आरोग्य सेवक पुरुष ७४, कंत्राटी ग्रामसेवक ५८, कनिष्ठ सहायक (लिपिक) २८, पशुधन पर्यवेक्षक २६, कनिष्ठ अभियंता (स्थापत्य) ५०, स्थापत्य अभियांत्रिकी सहायक ४२, औषध निर्माण अधिकारी १०, पर्यवेक्षिका ९, पेसा क्षेत्रातील ११ विविध पदे भरली जाणार आहे.
भरतीसाठी पात्रता काय?
जिल्हा परिषदेतील कनिष्ठ साहाय्यकपदासाठी आता किमान पदवी आवश्यक असणार आहे. या आधी बारावी उत्तीर्णची भरती होत होती. त्यात बदल करण्यात आला असून, नियुक्तीसाठी पदवी ही शैक्षणिक अर्हता आवश्यक करण्यात आल्याची राजपत्रात अधिसूचना जारी करण्यात आली असल्याची माहिती जिल्हा परिषदेच्या सूत्रांनी दिली.
यासह या पदासाठी किमान ३० शब्द प्रतिमिनिट मराठी टंकलेखन किंवा ४० प्रति मिनिट इंग्रजी टंकलेखनाचे संगणक प्रमाणपत्र धारण करणे आवश्यक असल्याचे अधिसूचनेत म्हटले आहे. कनिष्ठ साहाय्यक पदावरील नियुक्तीसाठी पदोन्नतीने ४० टक्के, अनुकंपा तत्वावरील ५० टक्के व वाहनचालक यांना कायमस्वरूपी बदलीने १० टक्के प्रमाण लागू राहणार आहे. जिल्हा परिषदेत आगामी भरतीत कनिष्ठ सहाय्यकाची २८ पदे सरळ सेवा भरतीने भरण्यात येणार आहे.
Discussion about this post