मुंबई । येत्या दोन ते तीन महिन्यानंतर राज्यातील विधानसभा निवडणुका पार पडणार असून यासाठी सगळेच पक्ष जोरदार तयारीला लागले आहे. मात्र याच दरम्यान छत्रपती संभाजीनगरात उद्धव ठाकरे भाजपला धक्का देत आहेत तर नाशिकमध्ये शरद पवार अजित पवार यांना धक्का देत आहे.
या दोन्ही ठिकाणाचे बडे पदाधिकारी पक्ष सोडून नवीन ठिकाणी जात आहेत. अजित पवार गटाला नाशिकमध्ये शरद पवार गटाचा धक्का आहे. नाशिकचे अजित पवार गटाचे प्रदेश सरचिटणीस नानासाहेब महाले आज शरद पवार गटात प्रवेश करत आहे. त्यांच्यासोबत १०० पदाधिकारी शरद पवार गटात प्रवेश करणार आहे. त्यामुळे अजित पवार यांना नाशिक जिल्ह्यात हा मोठा धक्का आहे.
लोकसभा निवडणुकीत शरद पवार गटाला आठ जागा मिळाल्या. शरद पवार गटाने दहा जागा लढवल्या होत्या. परंतु अजित गटाला एकच जागा मिळाली. नाशिकमध्ये लोकसभा निवडणुकीत राष्ट्रवादी काँग्रेसचे नेते छगन भुजबळ यांना भाजपने उमेदवारीसाठी झुलवत ठेवले. त्यामुळे राष्ट्रवादी काँग्रेसमध्ये नाराजी आहे. अजित पवार गटाचे प्रदेश सरचिटणीस नानासाहेब महाले म्हणाले, अजित पवार यांच्यासोबत मोठ्या अपेक्षेने गेलो होतो. मात्र लोकांची काम होत नव्हती. त्यामुळे आज पुन्हा शरद पवार गटात प्रवेश करत आहे.
शरद पवार नाशिकमध्ये अजित पवार यांना धक्का देत असताना छत्रपती संभाजीनगरात उद्धव ठाकरे भाजपला धक्का देत आहे. भाजप नेते आणि माजी उपमहापौर राजू शिंदे भाजपसोडून शिवसेनेत जात आहे. त्यांच्यासोबत 6 नगरसेवक उद्धव ठाकरे यांच्या शिवसेनेत जात आहेत. तसेच अनेक पदाधिकारी आहे. गोकुळ मलके (नगरसेवक भाजप), प्रल्हाद निमगावकर (नगरसेवक भाजप), अक्रम पटेल (नगरसेवक राष्ट्रवादी), प्रकाश गायकवाड ( नगरसेवक अपक्ष), रुपचंद वाघमारे (नगरसेवक अपक्ष) हे शिवसेनेत जात आहेत.
Discussion about this post