मुंबई : मुंबईतील पवई परिसरात 23 वर्षीय एअर होस्टेसची गळा चिरुन हत्या करण्यात आल्याची घटना समोर आली असून या घटनेने मोठी खळबळ उडाली आहे. या प्रकरणी पवई पोलिसांनी हत्येचा गुन्हा दाखल केला असून इमारतीत साफसफाईचं काम करणाऱ्या इसमाला ताब्यात घेतलं आहे.
मरोळ मारहाव रोडवर असलेल्या एन जी कोऑपरेटिव्ह हाऊसिंग सोसायटीमध्ये मृत एअर होस्टेस राहत होती. रुपल ओग्रे असं तिचं नाव होतं. ती मूळची छत्तीसगडची असून एप्रिलमध्ये एअर इंडियामध्ये (Air India) प्रशिक्षणासाठी मुंबईत आली होती. राहत्या घरी मध्यरात्री तिचा मृतदेह सापडला. गळा चिरुन तिची हत्या करण्यात आली होती. याची माहिती मिळताच पवई पोलिसांना घटनास्थळी धाव घेतली. पंचनामा करुन तिचा मृतदेह शवविच्छेदनासाठी कूपर रुग्णालयात पाठवण्यात आला.
पवई पोलिसांनी भारतीय दंड संहिता कलम 302 अन्वये अज्ञात व्यक्तीविरुद्ध खुनाचा गुन्हा दाखल केला. त्यानंतर आरोपीच्या शोधासाठी चार पथकं तयार करण्यात आली.
इमारतीमध्ये साफसफाई करणारा इसम ताब्यात
पोलिसांच्या तपासादरम्यान एअर होस्टेसच्या हत्या प्रकरणात इमारतीमध्ये साफसफाईचं काम करणाऱ्या इसमाला पवई पोलिसांनी ताब्यात घेतलं. पोलीस त्याची चौकशी करत आहेत. चौकशीअंती हत्येचं मूळ कारण समोर येईल. बहिण आणि मित्रासोबत राहत होती, परंतु ते दोघे आठ दिवसांपूर्वी गावाला गेले होते. एअर होस्टेस रुपल ओग्रे घरात एकटीच असताना तिची हत्या करण्यात आली.
Discussion about this post