नवी दिल्ली । महाराष्ट्रातील रिक्त राज्यसभा जागांसाठी झालेल्या बिनविरोध निवडणुकीनंतर नव्या खासदारांचा शपथविधी सोहळा दिल्लीतील संसद भवनात उत्साहात पार पडला. उपराष्ट्रपती आणि राज्यसभा सभापती सी. पी. राधाकृष्णन यांच्या उपस्थितीत नव्या सदस्यांनी राज्यसभा सदस्य म्हणून शपथ घेतली.
या निवडणुकीत महाराष्ट्रातून ज्येष्ठ नेते शरद पवार, रामदास आठवले, ज्योती वाघमारे, रामराव वडकुते आणि माया इवनाते यांच्यासह एकूण 19 जणांनी राज्यसभा सदस्य म्हणून शपथ घेतली. शपथविधी सोहळ्यानंतर राज्यातील राजकीय वर्तुळात उत्साहाचे वातावरण निर्माण झाले.
दरम्यान, नव्या खासदारांना मिळणाऱ्या पगार आणि सुविधांबाबत नागरिकांमध्ये उत्सुकता वाढली आहे. सध्याच्या नियमांनुसार राज्यसभा सदस्यांना दरमहा सुमारे 1.24 लाख रुपये मूलभूत वेतन दिले जाते. याशिवाय दररोज 2,500 रुपयांचा दैनिक भत्ता, मतदारसंघ कामकाजासाठी सुमारे 87 हजार रुपये आणि कार्यालयीन खर्चासाठी 75 हजार रुपये मासिक भत्ता मिळतो.
पगारासोबतच खासदारांना दिल्लीमध्ये मोफत सरकारी निवासस्थान, वीज-पाणी सुविधा, वैद्यकीय सेवा, वर्षातून ठराविक विमान प्रवासाची सुविधा आणि रेल्वेचा फर्स्ट क्लास पास अशा विविध सुविधा दिल्या जातात. या सुविधांमुळे संसदीय कामकाज अधिक प्रभावीपणे पार पाडण्यास मदत होत असल्याचे सांगितले जाते.
Discussion about this post