कार व दुचाकीच्या भीषण अपघातात शिरसोलीचा तरुण ठार

जळगाव । जळगावात कार व दुचाकीचा अपघात होऊन नीलेश केशव बारी (४४, मूळ रा. शिरसोली, ह. मु, शास्त्रीनगर) यांचा रात्री रामदास कॉलनीत जागीच मृत्यू झाला.

याबाबत असे की, नीलेश बारी हे कुटुंबीयांसह गिरणा टाकी परिसरातील शास्त्री नगरात राहत होते. रात्री ते सागर पार्ककडून दुचाकीने घराकडे जात असताना रामदास कॉलनीतील हनुमान मंदिराच्या गल्लीत अचानक समोर एक कार आली व दुचाकीस्वार नीलेश बारी हे कारवर धडकले. ते कारच्या दरवाजावरील काचवर आदळल्याने डोक्याला गंभीर दुखापत होऊन मोठा रक्तस्त्राव झाला.

ते बराच वेळ रक्ताच्या थारोळ्यात पडलेले होते. त्याठिकाणाहन जाणाऱ्या एका तरुणाने जखमी बारी यांना शासकीय वैद्यकीय रुग्णालयात दाखल केले. वैद्यकीय अधिकारी डॉ. अमोल पाटील यांनी मयत घोषीत केले. कागदपत्रावरून पटली ओळख नीलेश बारी यांच्या खिशातील कागदपत्रांवरुन त्यांची ओळख पटल्यानंतर त्यांच्या कुटुंबियांसोबत संपर्क साधला. त्यानुसार बारी यांचे वडील व पत्नी रुग्णालयात पोहचले. यावेळी त्यांचा मृतदेह बघताच त्यांनी आक्रोश केला.