जळगाव : लग्नासाठी फसवणूक करण्याचे अनेक प्रकार घडत असतात. परंतु धरणगाव येथील निनाद विनोद कापुरे याने कोणाला नायब तहसीलदार तर कोणाला क्लास वन ऑफिसर सांगून अनेक तरुणींना लग्नाच्या नावाने गंडविल्याचा धक्कादायक प्रकार उघडकीस आला नाशिक आणि फलटण येथील तरुणींनी यासंदर्भात बुधवारी (१६ जुलै) पोलिस अधीक्षकांना भेटून लेखी तक्रार केली. यापैकी फलटणची तरुणी डॉक्टर आहे. तरुणींच्या तक्रारीवरुन नाशिक व फलटण येथे त्याच्याविरुध्द गुन्हा दाखल झालेला आहे, मात्र नाशिकच्या गुन्ह्यात अद्याप अटक झालेली नाही.
या तरुणींनी दिलेल्या माहितीनुसार, मॅरेज ब्युरो या ऑनलाइन साईटवरुन निनाद कापुरे याने त्यांच्याशी संपर्क साधला. आई, वडिलांच्या संमतीने त्याने नाशिकच्या तरुणीकडून सात लाख तर फलटणच्या डॉक्टर तरुणीकडून आठ लाख रुपये उकळले. आपल्याला पदोन्नती मिळाली असून, पुणे येथे तहसीलदार पदावर नियुक्ती होत असल्याने पैशाची गरज असल्याचे सांगून ही रक्कम घेतली. निनाद हा आधीच विवाहित असून, त्याचीही कोर्टात केस सुरु असल्याचे समजल्याने या दोन्ही तरुणींनी तक्रारी केल्यावरुन त्याच्याविरुध्द फलटण आणि नाशिकला गुन्हा दाखल झाला. फलटणच्या गुन्ह्यात त्याला अटक झाली असून नाशिकच्या गुन्ह्यात अटक झालेली नाही. त्यामुळे त्याला अटक व्हावी, उकळलेली रक्कम परत मिळावी व भविष्यात आणखी तरुणींची फसवणूक होऊ नये यासाठी पोलिस अधीक्षकांना भेटून लेखी तक्रार केल्याचे या तरुणींनी सांगितले.
सरकारी लाल दिव्याच्या वाहनातील तसेच तहसीलदारांच्या खुर्चीवर बसलेले फोटो या तरुणींना त्याने पाठविले आहेत. हे सर्व फोटो व पैशाचे पुरावे पोलिस अधीक्षकांकडे सादर करण्यात आले आहेत. आतापर्यंत त्याने अशाच प्रकारे सहा तरुणींना फसविले असल्याचे या तरुणींनी सांगितले.
Discussion about this post