जळगाव । जिल्ह्यात लाचखोरीच्या घटना कमी होण्याची चिन्हे दिसत नसतानाच यावल परिसरात वन विभागातील कर्मचाऱ्याच्या लाच मागणीप्रकरणी एसीबीने कारवाई केली आहे. लाकूड वाहतुकीवर कारवाई टाळण्यासाठी १० हजार रुपयांची मागणी केल्याप्रकरणी वनरक्षक भैय्यासाहेब भीमराव गायकवाड (वय ४३) यांच्याविरुद्ध गुन्हा दाखल करण्यात आला आहे.
माहितीनुसार, तक्रारदार हे बोलेरो पिकअप वाहनांच्या साहाय्याने यावल व परिसरात लाकूड वाहतुकीचा व्यवसाय करतात. या वाहतुकीवर कोणतीही अडचण निर्माण होऊ नये आणि वन विभागाकडून कारवाई टाळावी यासाठी गायकवाड यांनी १० हजार रुपयांची लाच मागितल्याचा आरोप आहे.
या संदर्भात तक्रारदारांनी २० मार्च २०२६ रोजी लाचलुचपत प्रतिबंधक विभागाकडे धाव घेतली. तक्रारीची पडताळणी केल्यानंतर लाच मागणीचे स्पष्ट संकेत मिळाल्याने एसीबीने सापळा कारवाई आखली. चर्चेदरम्यान आरोपीने रक्कम ९ हजारांवर आणण्याची तयारी दर्शविली होती. मात्र प्रत्यक्ष पैसे स्वीकारण्याच्या वेळी संशय आल्याने त्यांनी रक्कम स्वीकारण्यास टाळाटाळ केली.
तरीदेखील लाच मागणीचे पुरावे हाती लागल्यामुळे फैजपूर पोलीस ठाण्यात भ्रष्टाचार प्रतिबंधक कायद्यांतर्गत गुन्हा नोंदविण्यात आला आहे. कारवाईदरम्यान आरोपीकडून ९,०४० रुपये रोख रक्कम तसेच दोन मोबाईल फोन जप्त करण्यात आले असून, त्यांचा तपास सुरू आहे.
यांनी केली कारवाई
ही कारवाई पोलीस उपअधीक्षक योगेश ठाकूर यांच्या मार्गदर्शनाखाली पोलीस निरीक्षक रेशमा अवतारे यांच्या नेतृत्वाखालील पथकाने केली. या पथकात पोलिस कर्मचारी बाळू मराठे, राकेश दुसाने, सुरेश पाटील आदींचा समावेश होता. पुढील तपास पोलीस निरीक्षक हेमंत नागरे करीत आहेत. या कारवाईमुळे वन विभागातील लाचखोरीच्या प्रकारांवर अंकुश बसण्याची अपेक्षा व्यक्त होत आहे.
Discussion about this post