जळगाव । जळगाव शहरासह जिल्ह्यात सध्या हिवाळ्याची तीव्रता मोठ्या प्रमाणात कमी झाली असून उकाड्याला सुरुवात झाली आहे. सकाळी आणि रात्री जाणवणारी थंडी कमी होत चालली असून दुपारच्या वेळेत उन्हाची तीव्रता वाढू लागली आहे. आज ९ फेब्रुवारी रोजी हवामान कोरडे आणि उबदार राहणार असून कालच्या तुलनेत दिवसाचे तापमान किंचित वाढलेले राहण्याची शक्यता आहे.
रविवारी जळगावमध्ये किमान तापमान १३.२ अंश सेल्सिअस नोंदवले गेले, तर कमाल तापमान ३२.५ अंशांपर्यंत पोहोचले. येत्या महाशिवरात्रीपर्यंत तापमान ३८ अंशांपर्यंत जाण्याची शक्यता वर्तवली जात आहे. फेब्रुवारीच्या शेवटच्या आठवड्यानंतर दिवस आणि रात्री दोन्ही तापमानात वाढ होण्याची शक्यता आहे.
आजचे हवामान :
आज (९ फेब्रुवारी) हवामान प्रामुख्याने स्वच्छ आणि कोरडे राहण्याचा अंदाज आहे. दिवसा कमाल तापमान ३३ ते ३५ अंश सेल्सिअस दरम्यान राहू शकते, त्यामुळे दुपारच्या वेळी उष्णता अधिक जाणवेल. पुढील सहा दिवस पावसाची शक्यता नसल्याचेही सांगण्यात आले आहे.
सूर्यकिरणांची तीव्रता वाढणे आणि दिवस लांब होणे यामुळे दुपार व संध्याकाळी उकाडा जाणवेल. मात्र, रात्री जमिनीजवळ थंड हवा टिकून राहिल्याने किमान तापमान १४ ते १६ अंशांच्या दरम्यान राहण्याचा अंदाज आहे. त्यामुळे सकाळी आणि रात्री गारवा कायम राहणार आहे. १४ आणि १५ फेब्रुवारीपासून तापमानात आणखी वाढ होण्याची शक्यता असून उष्णतेची तीव्रता वाढेल. त्यामुळे नागरिकांनी कुलर-फॅन दुरुस्तीसाठी काढण्यास सुरुवात केली आहे.
Discussion about this post