महाराष्ट्रावर दुहेरी संकट; ‘या’ जिल्ह्यांना अवकाळी पावसाचा इशारा, जळगावात काय स्थिती?

जळगाव : मार्च महिन्याच्या सुरुवातीला राज्यात प्रखर उकाड्याने नागरिक त्रस्त झाले होते. त्यानंतर अचानक वातावरणात मोठा बदल झाला असून काही भागांत गारपीट आणि पावसाची परिस्थिती निर्माण झाली आहे. मागील 24 तासांत राज्यातील हवामानात लक्षणीय बदल दिसून आला असून वेगवेगळ्या भागांत भिन्न हवामानाचा अनुभव येत आहे. विशेषतः जळगाव जिल्ह्यात तापमानात वाढ होण्याची शक्यता व्यक्त करण्यात आली आहे.

हवामान विभागाच्या माहितीनुसार, सध्या देशाच्या वातावरणावर वेस्टर्न डिस्टरबन्स आणि सायक्लोनिक सर्क्युलेशन या दोन महत्त्वाच्या प्रणालींचा एकत्रित प्रभाव पडत आहे. या हवामानातील हालचालींमुळे वातावरणात मोठ्या प्रमाणात अस्थिरता निर्माण झाली आहे. भूमध्य समुद्राकडून येणारे ओलसर वारे हिमालयाच्या दिशेने जाऊन आदळत असल्याने उत्तर भारतातील अनेक भागांत पाऊस आणि हिमवृष्टी होत आहे.

दरम्यान, या प्रणालीमुळे ढगांची गोलाकार हालचाल सुरू झाली असून अरबी समुद्र आणि बंगालच्या उपसागरातून येणाऱ्या आर्द्र वाऱ्यांमुळे वातावरणातील ओलावा वाढत आहे. हे ओलसर वारे गरम हवेशी संपर्कात आल्यावर अचानक विजांच्या कडकडाटासह पावसाच्या सरी कोसळण्याची शक्यता वाढते. त्यामुळे राज्यातील काही भागांत हवामानात अचानक बदल होताना दिसत आहे.

हवामान तज्ज्ञांनी पश्चिम महाराष्ट्रात वादळी वाऱ्यासह पावसाचा अंदाज व्यक्त केला असून वाऱ्याचा वेग ताशी सुमारे 50 किलोमीटर पर्यंत पोहोचू शकतो. पश्चिम महाराष्ट्रातील सातारा, सांगली आणि धारशिव या भागांत पावसाची शक्यता व्यक्त करण्यात आली आहे, दुसरीकडे मुंबई आणि कोकणातील काही जिल्ह्यांप्रमाणेच जळगाव जिल्ह्यातही उष्णतेची तीव्रता वाढण्याची शक्यता आहे. त्यामुळे नागरिकांनी उष्माघात टाळण्यासाठी काळजी घेण्याचे आवाहन हवामान विभागाने केले आहे.