जर संजय दत्तने..; मुंबईत बॉम्बस्फोटबाबत उज्ज्वल निकमांचा धक्कादायक दावा

मुंबई । राष्ट्रपतीयांच्या शिफारसीनंतर राज्यसभेत जागा मिळवून राजकारणात पाऊल ठेवणारे ज्येष्ठ वकील उज्ज्वल निकम यांनी अभिनेता संजय दत्तबाबत एक धक्कादायक दावा केला आहे. ते म्हणाले की, १९९३ मध्ये मुंबईत झालेल्या बॉम्बस्फोटांमध्ये २६७ लोकांचा मृत्यू झाला नसता, जर अभिनेता संजय दत्तने ज्या शस्त्रांनी भरलेल्या गाडीतून एके-४७ बंदूक उचलली होती त्याबद्दल पोलिसांना कळवले असते तर ते टाळता आले असते.

उज्ज्वल निकम यांनी एका वृत्तवाहिनीला मुलाखत दिली. या मुलाखतीमध्ये त्यांनी सांगितले की, “अबू सलेमने बॉम्बस्फोटाच्या एक दिवस आधी संजय दत्तच्या घरी शस्त्रांनी भरलेली व्हॅन आणली होती. अभिनेत्याने त्यातून काही हँड ग्रेनेड आणि बंदुका घेतल्या होत्या, पण त्याने फक्त एके-47 बंदूक स्वतःकडे ठेवली आणि बाकी सर्व परत केले. जर संजय दत्तने पोलिसांना त्या शस्त्रांनी भरलेल्या व्हॅनबद्दल माहिती दिली असती, तर पोलिसांनी तपास केला असता आणि 12 मार्च 1993 रोजी झालेले बॉम्बस्फोट थांबवता आले असते.”

ते पुढे म्हणाले, “पोलिसांना माहिती न देणे हे इतक्या मोठ्या दहशतवादी हल्ल्याला कारणीभूत ठरले. अभिनेत्याच्या मौनामुळे अनेकांचे प्राण गेले.” संजय दत्तला टाडा अंतर्गत बेकायदेशीर शस्त्र बाळगल्याच्या आरोपाखाली अटक करण्यात आली होती. पण नंतर त्याला फक्त शस्त्र कायद्यांतर्गत दोषी ठरवण्यात आले आणि पाच वर्षांच्या तुरुंगवासाची शिक्षा झाली. अभिनेत्याने ही शिक्षा पुण्यातील येरवडा तुरुंगात पूर्ण केली. त्याला 2016 मध्ये सोडण्यात आले.

निकम यांनी मुलाखतीत हेही सांगितले की, जेव्हा संजय दत्तला शस्त्र कायद्यांतर्गत दोषी ठरवण्यात आले तेव्हा त्यांनी त्याला काय सांगितले. निकम म्हणाले, “मी त्याच्या चेहऱ्यावरील भाव बदलताना पाहिले. मला वाटले की तो धक्क्यात आहे. तो निकाल सहन करू शकत नव्हता आणि त्याचा चेहरा पडला होता. मी साक्षीदारांच्या बॉक्समध्ये उभ्या असलेल्या संजय दत्तला सांगितले, ‘संजय, असे करू नकोस. माध्यमे तुला पाहत आहेत. तू एक अभिनेता आहेस. जर तुला शिक्षेची भीती वाटत असल्यासारखे दिसले, तर लोक तुला दोषी समजतील. तुझ्याकडे अपील करण्याची संधी आहे.’ यावर दत्तने ‘जी सर, जी सर’ असे म्हटले आणि नंतर तो शांत झाला व तेथून निघून गेला.”

निकम यांनी संजय दत्तला निर्दोष ठरवले
निकम यांनी असाही दावा केला की, संजय दत्त निर्दोष आहे. त्याने बंदूक फक्त त्याला शस्त्रांचा शौक असल्यामुळे ठेवली होती. जरी कायद्याच्या दृष्टीने त्याने गुन्हा केला असला, तरी खरेतर तो एक साधा-सरळ माणूस आहे. संजयकडे एके-47 होती, पण त्याने कधीही त्याचा वापर केला नाही.