अशोक खरात प्रकरणाच्या संदर्भात रूपाली चाकणकर यांनी महिला आयोगाच्या अध्यक्षपदाचा राजीनामा दिला आहे. यानंतर आता महाराष्ट्र महिला आयोगाच्या पुढील अध्यक्ष कोण होणार? असा सवाल उपस्थित झाला होता. यानंतर आता यासाठी २ नावे चर्चेत आहेत. महाराष्ट्र महिला आयोगाच्या अध्यक्षपदासाठी वैशाली नागवडे आणि प्रतिभा शिंदे या दोघींची नावे समोर आली आहे.
वैशाली नागवडे कोण आहेत?
नागवडे या राष्ट्रवादी काँग्रेस पक्ष शरद पवार गटाच्या नेत्या आहेत. पवार कुटुंबीयांतील प्रत्येक नेत्यांशी त्यांचे घनिष्ट संबंध आहेत. त्यांनी पंचायत समितीचे सदस्य, अण्णासाहेब पाटील महामंडळाचे अध्यक्षपद, महानंदाचे अध्यक्षपद, पंचायतराज कमिटीचे अध्यक्षपद, प्रदेश सरचिटणीस पदाची जबाबदारी स्वीकारली आहे. राष्ट्रवादीतील सर्वाधिक मदत करणाऱ्या पदाधिकारी म्हणून त्यांचे नाव चर्चेत राहिले आहे. महिला बचत गट, आशा वर्कर्स, अंगणवाडी सेविका यांच्यासाठी त्यांनी मोठे योगदान दिले आहे.
प्रतिभा शिंदे कोण आहेत?
प्रतिभा शिंदे या जळगावमधील राष्ट्रवादीच्या नेत्या आहेत. स्थानिक स्वराज्य संस्थांच्या निवडणुकांच्या तोंडावर प्रतिभा शिंदे यांनी काँग्रेस सोडून राष्ट्रवादी अजित पवार गटात प्रवेश केला होता. दरम्यान प्रतिभा शिंदे यांच्या प्रवेशावरून काही अजित पवार गटातील नेते नाराज होते. कारण त्यांची पार्श्वभूमीवर वादाची राहिली आहे.
या दोन्ही नावांवर राष्ट्रवादी पक्ष गंभीरपणे विचार करत असल्याचे बोलले जात आहे. मात्र, अद्याप कोणताही अधिकृत निर्णय झालेला नाही. सरकारकडून लवकरच नवीन नियुक्ती जाहीर होण्याची शक्यता आहे.
Discussion about this post