प्रवाशांसाठी महत्वाची बातमी! रेल्वे प्रशासनाने ‘या’ दहा गाड्या केल्या रद्द

जळगाव । जर तुम्ही मनमाडहुन दौंड, पुणे ला जाणार असाल तर तुमच्यासाठी एक महत्वाची बातमी आहे. रेल्वे प्रशासनाने दहा रेल्वे गाड्या रद्द केल्या आहेत. दौंड ते मनमाड दरम्यानच्या रेल्वे लाईन दुहेरीकरण काम हाती घेतलं असून यामुळे या गाड्या रद्द करण्यात आल्या आहे.

यात भुसावळ मार्गे धावणाऱ्या गाड्यांचा समावेश आहे. शनिवार, 24 व रविवार, 25 सप्टेंबर रोजी हे काम केले जात आहे. दौंड-काष्टी, बेलवंडी-बेलापूर, पुणतांबा-कान्हेगाव तसेच अकोळनेर-सारोळा विभागातील 5.77 किमी अंतराचे दुहेरीकरणाचे काम केले जात आहे.

रद्द होणार्‍या गाड्यामध्ये जबलपूर-पुणे एक्स्प्रेस ही गाडी 23 रोजी जबलपूरहून सुटणार नाही, पुणे-जबलपूर ही गाडी पुण्यातून 25 रोजी सुटणार नाही. दादर-शिर्डी ही दादरहून 23 रोजी तर शिर्डी-दादर ही गाडी 24 रोजी, पुणे-निजामाबाद एक्स्प्रेस आणि निजामाबाद-पुणे एक्स्प्रेस या दोन्ही गाड्या 30 सप्टेबरपर्यंत रद्द असतील, पुणे-नांदेड ही गाडी 23 व 24 सप्टेंबर रोजी रद्द तर नांदेड-पुणे एक्स्प्रेस ही गाडी 24 व 25 रोजी रद्द असेल, राणी-कमलापती-पुणे एक्स्प्रेस ही 23 रोजी पुणे-राणी कमलापती एक्स्प्रेस ही गाडी 24 रद्द असेल. दरम्यान, 12 गाड्यांच्या मार्गातही रेल्वे प्रशासनाने बदल केला आहे.