जळगाव । जळगाव शहरातील रामानंद नगर पोलीस ठाण्यात दाखल असलेल्या खुनाच्या गुन्ह्यातील फरार आरोपीला जिल्हापेठ पोलिसांनी शिताफीने अटक करत मोठी कारवाई केली आहे. या कारवाईत मुख्य आरोपीसह त्याच्या साथीदाराला ताब्यात घेण्यात आले असून, त्यांच्या ताब्यातून दोन गावठी पिस्तूल, आठ तलवारी आणि एक मोटार सायकल असा एकूण १ लाख १५ हजार रुपयांचा मुद्देमाल जप्त करण्यात आला आहे.
पोलिसांना मिळालेल्या गोपनीय माहितीनुसार रामानंद नगर पोलीस ठाण्यात दाखल असलेल्या खुनाच्या गुन्ह्यातील आरोपी धनंजय उर्फ धिरज दत्तू कोळी हा जळगाव शहरात फिरत असल्याचे समोर आले होते. त्यानुसार जिल्हापेठ पोलीस ठाण्याचे प्रभारी अधिकारी अनिल वाघ यांच्या नेतृत्वाखाली विशेष पथकाने आर.आर. शाळा परिसरात सापळा रचून संशयितांना अडवले.
तपासादरम्यान आरोपींच्या मोटार सायकलची झडती घेतली असता, गाडीमध्ये लपवून ठेवलेली तलवार आणि गावठी कट्टा आढळून आला. पुढील चौकशीत आणखी शस्त्रे हस्तगत करण्यात आली. न्यायालयाने दोन्ही आरोपींना तीन दिवसांची पोलीस कोठडी सुनावली असून, या प्रकरणाचा पुढील तपास पोलीस उपनिरीक्षक गोपाल देशमुख करीत आहेत.
या धडक कारवाईमुळे शहरातील गुन्हेगारीवर आळा बसण्यास मदत होईल, असा विश्वास पोलिसांनी व्यक्त केला आहे.
Discussion about this post