जळगाव । जळगाव शहरातील आसोदा गेट नजीक रेल्वे रुळावर १७ वर्षीय मुलीचा मृतदेह आढळून आल्याने खळबळ उडाली आहे. कोमल संजय निंबाळकर (वय- १७, रा. हरिओम नगर) असं मृत तरुणीचं नाव असल्याचं समोर आलं असून याबाबत तालुका पोलिस ठाण्यात अकस्मात मृत्यूची नोंद करण्यात आली आहे.
याबाबत असे की जळगाव शहरातील कांचन नगर परिसरातील हरिओम नगरमधील रहिवासी असलेली कोमल निंबाळकर हिने इयत्ता अकरावीची परीक्षा दिली होती. ती आई, वडील, मोठा भाऊ यांच्यासह राहत होती. तिचे वडील मोलमजुरी करतात. सोमवार, ६ मे रोजी कोमल ही घरातून बाहेर गेली होती. त्या वेळी तिची आई व भाऊ तिचा शोध घेत होते. त्या वेळी एका महिलेने सांगितले की, ती आसोदा गेटकडे जाताना दिसली. त्या वेळी दोघेजण तिकडे गेले असता तेथे डाऊन लाईनवर खांबा क्रमांक ४२१ जवळ मुलगी मृतावस्थेत आढळून आली.
रेल्वेचा धक्का लागल्याने तिचा मृत्यू झाल्याची माहिती मिळाली. या विषयी रेल्वेच्या अधिकाऱ्यांनी तालुका पोलिसांना माहिती दिली. त्या वेळी पोलिस तेथे पोहचले व त्यांनी कोमलचा मृतदेह शासकीय वैद्यकीय महाविद्यालय व रुग्णालयात नेला. या प्रकरणी तालुका पोलिस ठाण्यात अकस्मात मृत्यूची नोंद करण्यात आली आहे.
Discussion about this post