पुणे । जवळपास दोन महिन्यापूर्वी पुण्यातल्या खराडी भागात सुरू असलेल्या रेव्ह पार्टीवर पोलिसांनी छापा टाकला होता. या प्रकरणात ज्येष्ठ नेते एकनाथ खडसे यांच्या जावयासह सहा जणांना अटक करण्यात आली होती. तब्बल दोन महिन्यांनंतर खडसे यांचे जावई प्रांजल खेवलकर यांना या प्रकरणात जामीन मिळाला आहे. दरम्यान या ड्रग्स प्रकरणात प्रांजल खेवलकर आणि इतर आरोपींची फॉरेन्सिक अहवाल पोलिसांना प्राप्त झाले असून अहवालामधून धक्कादायक माहिती समोर आली आहे. प्रांजल खेवलकर आणि इतर आरोपींनी ड्रग्सचं सेवन केलं नसल्याचं या अहवालातून स्पष्ट झाल्याची माहिती समोर येत आहे.
मिळालेल्या माहितीनुसार, “खराडी ड्रग्स पार्टी प्रकरणात प्रांजल खेवलकर यांच्यासह इतर सहा जणांना अटक केल्यानंतर पोलिसांनी त्यांच्या रक्ताचे नमुने फॉरेन्सिकला पाठवले होते. यांनतर आता हा फॉरेन्सिक अहवाल पोलिसांना प्राप्त झाला असून, त्यात खेवलकर यांच्यासह कुणीही ड्रग्सचे सेवन केले नसल्याची माहिती समोर आली आहे. त्यानंतर आता हाच रिपोर्ट पोलिसांनी चार्जसीटमध्ये देखील दिले असून, हे रिपोर्ट न्यायालयात सादर करण्यात आल्याचे बोलले जात आहे.
रिपोर्टनंतर एकनाथ खडसे काय म्हणाले?
प्रांजल खेवलकर यांनी कोणत्याही प्रकारे ड्रग्सचे सेवन केलेले नाही हे मी आधीपासूनच सांगत होतो. सात जणांची रेव्ह पार्टी होऊ शकत नाही. त्यांच्यावर कोणताही गुन्हा दाखल नसताना गुन्हे दाखल आहेत, असे दाखवण्यात आले. शेवटी पोलीस म्हणाले ही प्रिंटिंग मिस्टेक आहे, या सगळ्या गोष्टी बघता हा रचलेला एक कट आहे असं वाटतं, असे एकनाथ खडसे यांनी म्हटले.
Discussion about this post