आगामी विधानसभा निवडणूक तोंडावर आली असता यातच गेल्या काही दिवसांपासून भारतीय जनता पक्षाचे अनेक नेते हे राष्ट्रवादी शरदचंद्र पवार पक्षामध्ये प्रवेश करत असल्याचं दिसून येत आहे. आता अशातच शरद पवारांनी भाजपला पुन्हा ‘दे धक्का दिला आहे.
पुण्यामध्ये महायुतीला मोठा धक्का बसला असून भारतीय जनता पक्षाचे माजी आमदार बापूसाहेब पठारे यांनी राष्ट्रवादी शरदचंद्र पवार पक्षामध्ये प्रवेश केला आहे. बापूसाहेब पठारे हे राष्ट्रवादी शरदचंद्र पवार पक्षामध्ये प्रवेश करणार असल्याच्या चर्चा रंगल्या होत्या. गणेशोत्सव कार्यक्रमामध्ये बोलताना बापूसाहेब पठारे यांनी विधानसभा लढवणार असल्याचे म्हटले होते. तसेच तुतारीला मतदान करा, असे आवाहनही त्यांनी केले होते. पठारे यांच्या या आवाहनानंतर ते लवकरच भाजपची साथ सोडून शरद पवारांच्या राष्ट्रवादीत जातील असे बोलले जात होते.
अखेर यावर शिक्कामोर्तब झाले असून माजी आमदार बापूसाहेब पठारे यांनी त्यांचे चिरंजीव सुरेंद्र पठारे व तीन माजी नगरसेवकांसह राष्ट्रवादी शरदचंद्र पवार पक्षात जाहीर प्रवेश केला. शरद पवार यांच्या उपस्थितीत त्यांच्या मुंबईतील सिल्व्हर ओक या निवासस्थानी हा पक्षप्रवेश सोहळा पार पडला. ऐन निवडणुकीच्या तोंडावर हा भाजपसाठी मोठा धक्का मानला जात आहे.
Discussion about this post