राज्यातील राजकारणात कायम एकमेकांवर टीका-प्रत्युत्तर करणारे दोन नेते अचानक समोरासमोर आल्याने जळगाव जिल्ह्यात चर्चेला उधाण आले आहे. कट्टर विरोधक म्हणून ओळखले जाणारे ठाकरे गटाचे खासदार संजय राऊत आणि शिंदे सेनेचे मंत्री गुलाबराव पाटील हे दोघे धरणगाव येथील एका विवाह सोहळ्यात एकाच ठिकाणी उपस्थित राहिल्याने राजकीय वर्तुळाचे लक्ष वेधले गेले.
धरणगाव येथे शिवसेनेचे उपनेते गुलाबराव वाघ यांच्या मुलाच्या विवाह सोहळ्याला दोन्ही नेते आले होते. सध्याच्या तणावपूर्ण राजकीय वातावरणात एकमेकांवर सातत्याने आरोप-प्रत्यारोप करणारे हे नेते अचानक आमने-सामने आल्याने उपस्थित पदाधिकारी आणि कार्यकर्त्यांमध्ये उत्सुकता निर्माण झाली.
दुरून नमस्कार, नंतर हस्तांदोलन
संजय राऊत यांनी विवाहस्थळी प्रवेश करताच मंत्री गुलाबराव पाटील यांना दूरून हात दाखवत नमस्कार केला. त्यावर गुलाबराव पाटील यांनीही हसत नमस्कार स्वीकारला. काही वेळाने वधू-वरास शुभेच्छा देताना दोघे पुन्हा समोरासमोर आले आणि एकमेकांच्या हातात हात घेत हस्तांदोलन केले. विशेष म्हणजे, राऊत यांनी पाटील यांच्या पाठीवर थाप देत आपुलकीचा इशाराही दिला.
एकाच रांगेत बसले, पण नजरानजर टाळली
विवाह सोहळ्यात दोन्ही नेते काही वेळ एकाच रांगेत बसले होते; मात्र त्यानंतर त्यांनी एकमेकांकडे पाहणे टाळल्याचेही दिसून आले. त्यामुळे या भेटीतला अबोल संवाद आणि औपचारिक आपुलकी उपस्थितांसाठी चर्चेचा विषय ठरला.
कट्टर विरोधकांमधील ही अनपेक्षित भेट आणि मनमोकळे हास्य पाहून राजकीय वर्तुळात विविध चर्चांना उधाण आले असून, ‘राजकारण वेगळं आणि सामाजिक कार्यक्रम वेगळे’ असा संदेश या भेटीतून दिला गेला, अशी प्रतिक्रिया अनेकांनी व्यक्त केली.
Discussion about this post