मुंबई । महाराष्ट्रात अल्पसंख्याक मंत्रालयाची धुरा सांभाळणाऱ्या उपमुख्यमंत्री अजित पवार यांच्या अपघाती निधनाच्या दिवशी अल्पसंख्याक खात्याशी संबंधित अनेक फाईली मंजूर झाल्याचे धक्कादायक प्रकार समोर आले आहेत. या प्रकरणात राज्यातील ७५ शाळा आणि शिक्षण संस्थांना अल्पसंख्याक दर्जा देण्यात आला. अल्पसंख्याक खात्यातील वरिष्ठ अधिकाऱ्यांनी ज्येष्ठ नेत्यांच्या निधनाच्या दिवशी फाईल मंजूर करण्यासाठी दबावाचा वापर केला असल्याचे आरोप समोर आले आहेत. या संदर्भात आरोप आहे की, काही अधिकाऱ्यांनी पैशासाठी फाईल्सवर तत्काळ स्वाक्षरी केली.
अजित पवार यांचे पुतणे आणि राष्ट्रवादी काँग्रेसचे आमदार रोहित पवार यांनी या प्रकरणावर गंभीर भूमिका घेतली आहे. रोहित पवार म्हणाले की, मंजूर झालेल्या फाईलचा रेट ३० ते ४० लाख रूपये होता आणि अजित पवार यांचा विरोध असूनही अधिकाऱ्यांनी पैशासाठी फाईल मंजूर केली.
दरम्यान, मुख्यमंत्री देवेंद्र फडणवीस यांनी या घटनेची गंभीर दखल घेत तातडीने चौकशीचे आदेश दिले आहेत. दोषी अधिकाऱ्यांवर लगोलग कारवाई करण्याच्या सूचना देखील देण्यात आल्या आहेत.
रोहित पवारांच्या मागण्या
रोहित पवार यांनी मागणी केली आहे की, चौकशी फक्त आदेश देण्यापुरती मर्यादित राहू नये. प्रकरण १० दिवसांत निकाली काढले पाहिजे आणि दोषी अधिकाऱ्यांना नोकरीतून बरखास्त केले पाहिजे, अशी आक्रमक मागणी त्यांनी केली.
Discussion about this post