राज्यात गेल्या काही दिवसांपासून तुफान पाऊस सुरू आहे. विदर्भाला पावसानं झोडपून काढलं आहे दरम्यान आजही नागपूरसह विदर्भातील 5 जिल्ह्यांना हवामान विभागाकडून ऑरेन्ज अलर्ट जारी करण्यात आला आहे. याशिवाय राज्यातील इतर अनेक भागांमध्ये मुसळधार ते अतिमुसळधार पावसाचा इशारा देण्यात आला आहे. जळगाव जिल्ह्यातही जोरदार पावसाचा अंदाज हवामान खात्याने वर्तविला आहे.
हवामान विभागाच्या प्रादेशिक हवामान केंद्राने वर्तवलेल्या अंदाजानुसार आज कोकण-गोवा जिल्ह्यांमध्ये आणि मध्य महाराष्ट्रातील घाट भागात काही ठिकाणी मुसळधार पाऊस पडण्याची शक्यता आहे. उत्तर मध्य महाराष्ट्र आणि मराठवाड्यातील काही जिल्ह्यांमध्ये काही ठिकाणी विजांच्या कडकडाटासह वादळे आणि हलका ते मध्यम पाऊस पडण्याची शक्यता आहे. वाऱ्याचा वेग ताशी 30-40 किमी वेगाने वाढेल. मराठवाडा काही भागात मेघगर्जनेसह पावसाचा अंदाज वर्तवण्यात आला आहे.
या जिल्ह्यांना पुढील 24 तास ऑरेन्ज अलर्ट
आज विदर्भात जोरदार पावसाचा अंदाज वर्तवण्यात आला आहे. हवामान विभागाच्या अंदाजानुसार आज नागपूरसह भंडरा, गोंदिया, गडचिरोली आणि चंद्रपूर या जिल्ह्यांना ऑरेन्ज अलर्ट देण्यात आला आहे. तसेच गोंदिया गडचिरोली आणि चंद्रपूर या जिल्ह्यांना उद्या शुक्रवारी देखील ऑरेन्ज अलर्ट जारी करण्यात आला आहे. त्यामुळे नागरिकांनी आवश्यक ती खबरदारी घ्यावी असे आवाहन हवामान विभागाकडून करण्यात आले आहे.
या जिल्ह्यांना यलो अलर्ट जारी
विदर्भासह कोकण-गोवा जिल्ह्यांमध्ये आणि मध्य महाराष्ट्रातील घाट भागात काही ठिकाणी मुसळधार पाऊस पडण्याची शक्यता आहे. विदर्भातील बुलढाणा, अकोला, वाशिम, यवतमाळ, अमरावती आणि वर्धा या जिल्ह्यांना आज यलो अलर्ट जारी करण्यात आला आहे. याशिवाय कोकणात रायगड आणि रत्नागिरीसह सातारा घाटमाथ्याला देखील यलो अलर्ट जारी करण्यात आला आहे. या भागात मुसळधार पावसाचा अंदाज वर्तवण्यात आला आहे.
Discussion about this post