जळगाव विधानसभा निवडणुकीच्या पार्श्वभूमीवर पोलिसांनी जळगाव जिल्ह्यातील ठिकठिकाणी नाकाबंदी केली आहे. याच दरम्यान अमळनेर तालुक्यात तपासणी नाक्यावर पोलिसांच्या तपासणी वाहनात दीड कोटी रुपयांची रक्कम आढळून आल्याने खळबळ उडाली आहे.
दरम्यान, पोलीस सूत्रांनी दिलेल्या माहितीनुसार, कासोदा गावातील फरकांडे चौफुलीवर पोलिसांचे पथक सायंकाळी ६ वाजेच्या सुमारास नाकाबंदीसाठी थांबलेले होते. याचवेळी एका क्रेटा कारची तपासणी केली असता पोलिसांना तब्बल एक कोटी 45 लाखाची रोकड सापडली. मात्र ही रोकड नेमकी कोणाची आणि कशासाठी आणली होती? याचा खुलासा होऊ शकला नव्हता. पोलीस याचा शोध घेत आहेत.
दुसरीकडे अमळनेर तालुक्यातील चोपडाई तपासणी नाक्यावर पोलीस तपासणी करताना एका वाहनात १६ लाख ३८ हजार रुपयांची रोख रक्कम आढळल्याचे समोर आले आहे. विधानसभा निवडणुकीच्या पार्श्वभूमीवर अमळनेर पोलीस स्टेशनच्या अधिकाऱ्यांसह कर्मचाऱ्यांच्या पथकाकडून तपासणी करत कारवाई करण्यात आली आहे.
