जळगाव । राज्यातील नगरपरिषदा आणि नगरपंचायतींच्या निवडणुकांचे निकाल रविवारी जाहीर झाले असून यामध्ये जळगावातील नशिराबाद नगरपंचायत निवडणुकीत 77 वर्षांच्या आजीबाईं जनाबाई रंधे या नगरसेवकपदी विजयी झाल्या आहेत. वयाच्या 77 व्या वर्षी पायात साधी चप्पलही न घालता, कडक उन्हातान्हात प्रचार करणाऱ्या जनाबाई रंधे यांनी नगरसेवकपदी विजय मिळवला आहे.
भाजपच्या जनाबाई रंधे यांचा नशिराबादमध्ये प्रभाग ७ (अ) मधून दणदणीत विजय मिळवला आहे. जनाबाई भगवान रंधे यांचा विजय हा या निवडणुकीचे वैशिष्ट्य ठरला. यानिमित्ताने वय केवळ एक आकडा असतो, जनाबाई भगवान रंधे यांनी दाखवून दिले.नशिराबाद नगरपरिषदेच्या निवडणुकीत विजय मिळवल्यानंतर, जेव्हा त्या नगरपरिषद प्रांगणात आल्या, तेव्हा त्यांना आपले अश्रू अनावर झाले.
आपल्या कार्यकर्त्यांची आणि आप्तांची गळाभेट घेताना त्यांच्या डोळ्यांतील आनंदाश्रूंनी उपस्थितांचेही डोळे पाणावले. त्यांचा हा विजय केवळ राजकीय नसून तो जिद्द आणि विश्वासाचा विजय मानला जात आहे. जनाबाई रंधे यांना विजयी घोषित केल्यानंतर उपस्थितांनी एकच जल्लोष केला. या विजयामुळे जनाबाई रंधे 77 व्या वर्षी नगरसेवक झाल्या आहेत. वयाच्या ७७ व्या वर्षी जिथे अनेकजण निवृत्तीचा मार्ग स्वीकारतात, तिथे जनाबाईंनी लोकप्रतिनिधी म्हणून जबाबदारी स्वीकारून तरुणांसमोरही एक आदर्श ठेवला आहे.
Discussion about this post