नाशिक । एकीकडे राज्यात महापालिका निवडणुकीसाठी उमेदवारांच्या प्रचार, सभेला वेग आला असून मात्र याचदरम्यान पक्षातंराचे वारेही वाहत आहे. आता अशातच उपमुख्यमंत्री एकनाथ शिंदेंनी नाशिकमध्ये भाजपला मोठा धक्का दिला. १० दिवसांपूर्वी भाजपमध्ये प्रवेश केलेल्या माजी आमदाराने पक्षाला रामराम ठोकला. माजी आमदार नितीन भोसले यांनी शिवसेना शिंदे गटात प्रवेश केला.
तिकीट नाकारल्यामुळे नाराज झालेल्या नितीन भोसले यांनी धनुष्यबाण हाती घेतले. त्यामुळे महापालिका निवडणुकीपूर्वी भाजपसाठी हा मोठा धक्का असल्याचे मानले जात आहे. नितीन भोसले यांच्यासोबत आणखी दोन बड्या नेत्यांनी एकनाथ शिंदे यांच्या उपस्थितीमध्ये त्यांनी शिवसेनेत प्रवेश केला. महापालिका निवडणुकीसाठी तिकीट मिळेल या आशेने नितीन भोसले यांनी १० दिवसांपूर्वी भाजपमध्ये प्रवेश केला होता. पण ऐन वेळी नितीन भोसले यांना भाजपकडून तिकीट नाकारले गेले. त्यामुळे ते नाराज असल्याची चर्चा होती.
महापालिका निवडणुकीमध्ये भाजपने कुटुंबीयांना संधी दिली नाही त्यामुळे नितीन भोसले यांनी भाजपला सोडचिठ्ठी दिली आणि त्यांनी शिंदेंच्या शिवसेनेत प्रवेश केला. अवघ्या १० दिवसांत त्यांनी पक्ष बदलल्यामुळे नाशिकच्या राजकीय वर्तुळात याची चर्चा रंगली आहे. फक्त नितीन भोसलेच नाही तर नाशिकमध्ये आणखी दोन बड्या नेत्यांनी भाजपची साथ सोडली.
माजी महापौर अशोक मुर्तडक आणि माजी महापौर दशरथ पाटील यांनी देखील मंगळवारी उपमुख्यमंत्री एकनाथ शिंदे यांच्या उपस्थितीमध्ये शिवसेना शिंदे गटात प्रवेश केला. त्यामुळे एकाच दिवसांत ३ बड्या नेत्यांनी भाजपची साथ सोडल्यामुळे हा भाजपसाठी मोठा धक्का मानला जात आहे.
Discussion about this post