पुणे । पुण्यातील वाघोली परिसरातील बाईफ रोडवर एका महिलेने तिच्या दोन मुलांवर हल्ला केला. 11 वर्षांच्या मुलाचा यात मृत्यू झाला तर 13 वर्षांची तिची मुलगी गंभीर जखमी झाली असून रुग्णालयात जगण्यासाठी झुंज देत आहे. या घटनेमुळे सुसंस्कृत, सुशिक्षितांचं शहर म्हणून नावलौकिक असलेलं पुणं प्रचंड हादरलं आहेत.
सोनी संतोष जायभाय (मूळ रहिवासी कंधार, जिल्हा नांदेड) सध्या वाघोली येथील बाईफ रोड परिसरात वास्तव्यास असून, तिने हे कृत्य केल्याची प्राथमिक माहिती पोलिस तपासात समोर आली आहे. या घटनेत 11 वर्षांचा मुलगा साईराज संतोष जायभाय याचा जागीच मृत्यू झाला. तर 13 वर्षांची मुलगी धनश्री संतोष जायभाय ही गंभीर जखमी झाली असून, तिला तातडीने खाजगी रुग्णालयात दाखल करण्यात आले. डॉक्टरांच्या माहितीनुसार तिची प्रकृती सध्या स्थिर आहे.
घटनेची माहिती मिळताच वाघोली पोलिसांनी तात्काळ घटनास्थळी धाव घेत आरोपी महिलेला ताब्यात घेतले आहे. या घटनेमागचे नेमके कारण अद्याप स्पष्ट झाले नसून, कौटुंबिक वाद, मानसिक तणाव किंवा अन्य कारणांमुळे हे कृत्य घडले का, याचा सखोल तपास पोलीस करत आहेत.
दरम्यान, वाघोली परिसरात अवघ्या दोन दिवसांत घडलेली ही दुसरी गंभीर घटना असून, नागरिकांमध्ये भीती आणि संतापाचे वातावरण निर्माण झाले आहे. परिसरात तणाव पसरला असून, नागरिकांकडून हळहळ व्यक्त केली जात आहे.या प्रकरणाचा पुढील तपास वाघोली पोलीस करत आहेत.
Discussion about this post