नवीन मका बाजारात दाखल होताच घरसरला; आता इतका मिळतोय दर?

नंदुरबार : यंदा चांगला पाऊस झाला. यामुळे खरीप हंगामात लागवड करण्यात आलेल्या मक्याच्या काढणीला आता सुरवात झाली आहे. मात्र नवीन मक्याची आवक सुरु होताच एक हजार रुपयांनी दरात घसरण झाली आहे.

शेतकऱ्यांचा नवीन मका बाजारात विक्रीस दाखवण्यापूर्वी मक्याला २५०० रुपये दर मिळत होता. मात्र नवीन मका बाजारात दाखल होताच मक्याच्या दरात १००० ते १२०० रुपयांनी घट झाल्याने मका उत्पादक शेतकरी अडचणीत सापडला आहे. नंदुरबार (Nandurbar) जिल्ह्यातील नंदुरबार आणि शहादा बाजार समिती मोठ्या प्रमाणात मक्याचे आवक होत असते. मात्र मक्याचे दर कमी झाल्याने शेतकरी संतप्त झाला असून शेतकऱ्यांच्या घरात माल आल्यावर भाव कसे पडतात? असा प्रश्न उपस्थित केला जात आहे.

मक्याला हमीभाव जाहीर करा
मक्याला पंधराशे रुपयांचा दर मिळत असल्यास उत्पादन खर्चही निघत नसल्याची माहिती शेतकऱ्यांनी दिली आहे. सरकारने मक्का खरेदी संदर्भात भूमिका स्पष्ट करून मक्याला हमीभाव जाहीर करावा; अशी मागणी नंदुरबार जिल्ह्यातील मका उत्पादक शेतकऱ्यांनी केले आहे.