मुंबई | दिवाळीला आता काही दिवस उरले आहे. यादरम्यान, अनेक प्रवाशी एसटी बसने प्रवास करतात. मात्र ऐन दिवाळीच्या मुहूर्तावर एसटी महामंडळाने आपल्या तिकीट दरात वाढ झाली केली आहे. त्यामुळे दिवाळी निमित्ताने गावी जाणाऱ्या पर्यटकांच्या खिशाला चांगलाच भार पडणार आहे.
एसटी महामंडळाने आपल्या सर्व बस प्रकारच्या तिकीट दरात सरसकट 10 टक्के भाडेवाढ करण्याचा निर्णय घेतला आहे. त्यामुळे एसटीने दिवाळी निमित्त गावी जाणाऱ्या तसेच पर्यटनानिमित्त प्रवास करणाऱ्यांना प्रवाशांना या दरवाढीचा चांगलाच फटका बसणार आहे. दरवर्षी एसटी महामंडळ महसूलवाढीसाठी सुट्यांच्या दिवसात परिवर्तनशील हंगामी भाडेवाढ सूत्रानुसार भाडेवाढ करीत असते.
एसटी महामंडळाने ऐन दिवाळी सणाच्या तोंडावर भाडेवाढ जाहीर केली आहे. एसटी महामंडळाने आपल्या तिकीट दरात सरसकट 10 टक्के भाडे वाढ जाहीर केली आहे. ही भाडेवाढ 7 नोव्हेंबरच्या मध्यरात्रीपासून म्हणजे 8 ते 27 नोव्हेंबर दरम्यान लागू राहणार आहे. त्यानंतर मूळ तिकीटदराप्रमाणे तिकीट आकारणी सुरू होईल. तसेच, ज्या प्रवाशांनी आगाऊ तिकीट आरक्षण केले आहे, त्यांना त्यांच्या तिकीटाची उर्वरित फरकाची रक्कम प्रत्यक्ष प्रवास करताना वाहकाकडे भरावी लागणार आहे.
