जळगाव । जळगाव जिल्ह्यातील चाळीसगावमध्ये कॉम्प्युटर व्यावसायिकाकडून एक लाख वीस हजारांची खंडणी उकळणाऱ्या पोलीस कर्मचाऱ्याविरुद्ध गुन्हा दाखल करण्यात आला असून बलात्काराच्या गंभीर गुन्ह्यात कुठलाही सहभाग नसताना या गुन्ह्यात गोवण्याची धमकी देत पोलीस कर्मचाऱ्याने 1 लाख 20 हजार रुपये खंडणी उकळल्याची तक्रार कॉम्प्युटर व्यावसायिकाने चाळीसगाव पोलिसात केली आहे.
या प्रकरणी आमदार मंगेश चव्हाण यांनी पोलीस ठाण्यात ठिय्या आंदोलन करत पोलिसांवर गंभीर आरोप केले. याची तात्काळ दखल घेत जळगावचे पोलीस अधीक्षक डॉ.महेश्वर रेड्डी यांनी चाळीसगाव शहर पोलीस ठाण्याचे पोलीस निरीक्षक किरणकुमार कबाडी यांची नियंत्रण कक्षात तात्काळ बदली केली आणि त्या कर्मचाऱ्याचे निलंबन केले आहे.
काय आहे प्रकार?
चाळीसगाव शहर पोलीस ठाण्यातील एका कर्मचाऱ्याने गुन्ह्यातील संशयिताला आरोपी म्हणून नाव न टाकण्यासाठी १ लाख २० हजार रुपये लाच मागितल्याचा प्रकार उघडकीस आला. स्थानिक आमदार मंगेश चव्हाण यांना याची माहिती मिळताच त्यांनी तत्काळ पोलीस ठाण्यात धाव घेतली आणि या भ्रष्टाचाराविरोधात ठिय्या मांडला. त्यांनी पोलीस यंत्रणेवर गंभीर आरोप करत लाचखोरीला आळा घालण्याची मागणी केली. याप्रकरणी पोलीस कर्मचारी अजय पाटील विरुद्ध गुन्हा दाखल करण्यात आला आहे.
तर खंडणीची एक लाख वीस हजार रुपये रक्कमही पोलिसांनी जप्त केली आहे. सदर घटनेमुळे जळगाव जिल्हा पोलीस दलात मोठी खळबळ उडाली आहे. दरम्यान जळगावचे पोलीस अधीक्षक डॉ.महेश्वर रेड्डी यांनी या प्रकरणाची गंभीर दखल घेतली. चाळीसगाव शहर पोलीस ठाण्याचे निरीक्षक किरणकुमार कबाडी यांची तात्काळ नियंत्रण कक्षात बदली करण्यात आली असून कर्मचारी अजय पाटील याचे निलंबन करण्यात आले आहे. पुढील तपासासाठी आवश्यक पावले उचलण्याचे डॉ.रेड्डी यांनी निर्देश दिले.
Discussion about this post