चाळीसगावात एसीबीची मोठी कारवाई; दोन लाखाची लाच घेताना सरपंच, लिपीकसह पंटर जाळ्यात

जळगाव । चाळीसगाव तालुक्यातील बहाळ गावात धुळे लाचलुचपत प्रतिबंधक विभागाच्या (एसीबी) पथकाने एक महत्त्वपूर्ण कारवाई केली. या कारवाईत ग्रामपंचायतीचा सरपंच, लिपीक आणि एक पंटर या तिघांना दोन लाख रुपयांची लाच घेताना अटक करण्यात आली.

याबाबत असे की, ७० वर्षीय एक तक्रारदार यांची बहाळ रथाचे, ता. चाळीसगाव येथे शेतजमीन आहे. या शेतजमिनीवर ग्रामपंचायत, बहाळ हे त्यांचा हक्क दाखवून ही जागा परस्पर इतर व्यक्तीस भाडेतत्त्वावर देण्याची शक्यता होती. त्यामुळे तक्रारदार यांनी ग्रामपंचायतीविरुद्ध न्यायालयातून कायमस्वरूपी मनाई हुकूम आणला. त्यानंतर सरपंच राजेंद्र महादू मोरे (५७) याने तक्रारदार यांना भेटून त्यांच्या शेतजमिनीबाबत ग्रामपंचायतीकडून कुठलाही त्रास न होऊ देण्याच्या मोबदल्यात दीड हजार चौरस फुटाचा प्लॉट खरेदी करून द्यावा लागेल, असे सांगितले. यास तक्रारदाराने नकार दिल्याने मोरे याने १० लाख रुपयांची लाच मागितली. याबाबत पाच लाखांवर तडजोड झाली. लाचेतील पहिला हप्ता म्हणून दोन लाख रुपये देण्याचे ठरले.

गुरुवारी दुपारी, सरपंच राजेंद्र मोरे याच्या घरात पंटर सुरेश सोनू ठेंगे (४०) याने पैसे घेत असताना धुळे एसीबीच्या पथकाने त्याला अटक केली. नंतर सरपंच राजेंद्र मोरे व ग्रामपंचायत लिपीक शांताराम तुकाराम बोरसे (५०) यांनाही अटक करण्यात आली.

कारवाई करणारे अधिकारी
ही कारवाई धुळे एसीबीचे पोलिस उपअधीक्षक सचिन साळुंखे, निरीक्षक पंकज शिंदे, रुपाली खांडवी तसेच पथकातील राजन कदम, मुकेश अहिरे, संतोष पावरा, प्रवीण मोरे, सुधीर मोरे, रामदास बारेला, प्रवीण पाटील, जगदीश बडगुजर यांनी केली.

कारवाईचे व्यापक परिणाम
या कारवाईने जळगाव जिल्ह्यातील भ्रष्टाचाराविरुद्धच्या लढाईत एक महत्त्वपूर्ण पाऊल मानले जात आहे. एसीबीच्या निरंतर प्रयत्नांमुळे भ्रष्ट अधिकाऱ्यांना शिक्षा मिळत आहे, ज्यामुळे नागरिकांमध्ये विश्वास वाढत आहे. या घटनेने भ्रष्टाचाराविरुद्धच्या लढाईत नवीन ऊर्जा भरली आहे.