बुलढाणा । बुलढाणा जिल्ह्यातील खामगावमधून एक धक्कादायक घटना समोर आली असून त्यात एका तरुणाने घराशेजारी राहणाऱ्या तीन महिलांवर कोयत्याने जीवघेणा हल्ला केला. हल्ल्यात एका युवतीचा मृत्यू झाला असून दोन महिला गंभीर जखमी झाल्या आहेत. जखमी महिलांवर खामगाव आणि अकोला येथील रुग्णालयात उपचार सुरू आहेत. पोलिसांनी घटनास्थळी पोहोचून पंचनामा केला आणि आरोपीला अटक केली.
गोलू सारसर असे अटक केलेल्या आरोपीचे नाव आहे. त्याचा शेजारी राहणाऱ्या तीन महिलांशी काही दिवसांपासून वाद होता. हा वाद विकोपाला गेला आणि संतापलेल्या गोलूने तिघींवर धारदार कोयत्याने हल्ला केला. या हल्ल्यात एका युवतीचा जागीच मृत्यू झाला, तर दोन महिला गंभीर जखमी झाल्या.
पोलिसांची तत्पर कारवाई
घटनेनंतर स्थानिक लोकांनी घटनास्थळी धाव घेतली. त्यांनी पोलिसांना माहिती दिली आणि जखमी महिलांना उपचारासाठी रुग्णालयात दाखल केले. हल्ला केल्यानंतर आरोपी फरार झाला होता, पण पोलिसांनी तातडीने तपास करून रात्री तीन वाजता त्याला अटक केली. दोन्ही जखमी महिलांची प्रकृती चिंताजनक असल्याचे वैद्यकीय अधिकाऱ्यांनी सांगितले आहे. आरोपीचा संबंधित महिलांशी नेमका वाद काय होता आणि तो इतका टोकाला का गेला, याचा तपास पोलीस करत आहेत.
Discussion about this post